港式茶餐廳的優點是食物種類選擇多，要吃甚麼，就有甚麼。
意式碟頭飯、松露茸魚子醬、芝士公仔麵……算你聽過，斷估你未試過。
做人，最緊要有新鮮感。
難得價錢大眾化，錢，反正要花，謹記，入茶餐廳，無明文規定一定要叫奶茶菠蘿油。
中間界是夫妻檔，格局與一般港式茶餐廳無異，同樣是地方細細，老闆Ken兼廚師一職，老闆娘Wing負責收銀兼打雜。兩小口子一腳踢，很忙，卻愛在客人面前打情罵俏、互寸耍花槍，唯獨談吃，他們才會認真點，Ken說：「茶餐廳競爭咁大，一定要新嘢、有驚喜，先吸引到人，呢度無豆腐火腩飯、涼瓜牛肉飯呢類物體，Sorry喎。」Wing接着說：「係呀係呀！我老公煮嘢食好叻㗎！佢自創嘅意式碟頭飯，第二度一定無得食……」罕有地夫唱婦隨。
簡簡單單生菜底，芝士粉加沙律醬，蟹子份量極多，Ken說：「抵食夾大碟，茶餐廳本色嘛！」
豬頸肉飽肚，精華盡在香草醬，Ken說：「紫蘇葉、松子仁、黑椒溝欖油、忌簾、白酒，出嚟嘅香草醬好正，邊個話唔好食我就打邊個。」
水吧安仔囂張地說：「原味、特濃、朱古力、榛子、鮮奶咖啡，即磨即沖即飲，斷估出面啲茶廳餐都無啩？呢啲咪夠享夠獎囉！」
電話：28388453
地址：灣仔利東街56號地下
營業時間：7:30am至10:00pm
好一條金馬倫道，地舖連二樓食肆多達30間，要突圍而出，惟有行益街坊政策，新發茶餐廳總廚翁記說：「想當年好景，求其煎件扒都可以收人一百幾十，𠵱家？無呢支歌仔唱咯。」翁記很坦白：「要控制成本，老實講我用嘅絕非最頂級貨色，但話晒都係松露茸、魚子醬，始終係貴價貨，𠵱家擺低5個『金銀膶』就有得食，重想點呀老友？」
用去骨雞髀肉，中間釀入新鮮菠菜，味濃的黑松露茸溝欖油，啖啖肉。
魚子醬先開忌廉汁，三文魚扒煎得金黃香脆，嫌腥，可加檸檬汁。
電話：23014126
地址：尖沙嘴金馬倫道26至28號地下
營業時間：24小時
看門面，得罪說，新記不配稱為茶餐廳，舖面細，容不下10人，似快餐店多點，但獨沽一味芝士撈公仔麵卻賣到街知巷聞。老闆姜生不願上鏡，原因有二：一，怕醜，二，怕不好意思：「有次同朋友上××酒樓……邊間？賣龍蝦好出名嗰間呢，食芝士龍蝦伊麵底，正到痹呀，咪抄佢橋囉，用芝士撈公仔麵囉，估唔到啲客又咁受喎！」
配生菜一大條，淨無可淨的公仔麵，小梁解釋：「魷魚鬚先放湯，浸一浸，等蜜汁溶在湯裏面，信我啦，一撮麵一條魷魚鬚，一齊放入口，已經VeryGood。」
公仔麵要煮得乾身，採用高鈣低脂芝士加鮮奶、糖、牛油、雞粉熬成的芝士汁才好味，紅腸拼雞蛋是大路之選，忌拼甚麼沙嗲牛肉、炸菜肉絲，因其本身帶汁，會搶過芝士的香味。
阿寶：「一日三餐，全部喺新記解決，呢度啲芝士食極唔厭。」
電話：27224555
地址：尖沙嘴加連威老道21E地下
營業時間：7:15am至3:00am