古天樂噚日同陳啟泰、余安安同埋寰宇新人郭力行，喺銅鑼灣出席「伸手助人協會幸福曲奇義賣日」。古仔喺曲奇餅盒上親筆簽名作義賣，定價一百蚊一盒，fans當然爭住搶，佢哋除咗捐錢買曲奇餅外，又爭住同古仔影相兼攞簽名，不過古仔就話要買咗曲奇餅至可以攞簽名。
古仔將會第一次監製兼主演電影《豪情》，劇情係講兩個大學畢業生創立成人雜誌，由於有粗口同裸露鏡頭，所以部戲可能會被列為III級片，不過古仔話希望將部戲變做IIB級，所以套戲應該唔會有粗口，就算啲女模特兒要裸露，都會用鏡頭去就。
古仔又話：「我定落三年計劃，兩年後供滿咗層樓，會考慮投資拍戲做老闆，同埋試吓其他工作崗位，好似副導演或者編劇咁。」
另外，寰宇今年力捧嘅新人郭力行噚日亦有唱歌助興，重獲fans舉牌支持，佢𠵱家已經有四部片約喺手，其中一套喺三月開拍，同鄭伊健及趙薇齊齊演出嘅《炮製女朋友》，四月重會同黎明、吳鎮宇及鄭伊健合作拍警匪片，公司咁捧佢，郭力行話好有壓力，但就會做好本份。
周杰倫噚日喺香港赤鱲角機場出現，有半百歌迷到機場接機，唱片公司就安排咗約十名保安護駕。周杰倫着住風褸、戴住頂鴨嘴帽出現，歌迷見到佢即刻不停大嗌佢個名，同送禮物畀佢，搞到場面都有啲混亂。
男子組合E-kids噚日去荔枝角球場，出席「狗狗喜洋洋」活動。佢哋重同兩隻警犬合照，不過其中一隻警犬竟然出現生理反應，搞到E-kids好尷尬。成員Tommy話佢屋企嗰隻北京狗好鹹濕，佢話：「隻狗一見到人就好鍾意擒上佢哋個身度，好鬼鹹濕㗎。」
周麗淇噚日係灣仔Neway卡拉OK，為電影《下一站…天后》舉行嘅歌唱比賽做評判。佢話班參賽者好認真，又好有台風。周麗淇遲啲會同古天樂及陳奕迅合作新片《豪情》，佢話：「套戲係公司接嘅，我對導演陳慶嘉好有信心。」佢重話到時要露一露本錢喎！
