足總為搞好嘅現場氣氛，免費派飛畀全港小學，首日有六千多球迷入場，現場所見有老師帶住大班小學生入場，佢哋不停拍打賽會派發嘅吹氣膠棒為港隊打氣，氣氛頗熱鬧。
喺場頭場同尾場之間安排咗武術高手李暉，連同佢一百位徒弟仔表演武術，以娛球迷，順便宣揚中國武術，雖然打得唔算好齊，但就耍得好投入，球迷睇完自然拍晒手支持。
頭場蒙古鬥澳門，兩業餘隊對碰頭，戰情係點，大家心裏有數，下半場兩軍球員體力下降，輪流抽筋，計一計就有六個球員抽筋而要抬離場接受治療，而臨場尾更加舉步維艱添。
港隊靠郭裕洪同李偉文呢對愉園球員射垮台北，其實郭裕洪早段把握好啲港隊唔使打得咁辛苦。另外，足總公布編號299嘅球票被抽中，五月可免費去日本睇決賽周。