雖然第73屆瑞士日內瓦車展（73rdGenevaInternationalMotorShow），要到3月6日才正式揭幕，但不少歐洲車廠已急不及待，向外公布佢哋將會展出嘅車款，當中有勁辣跑車，又或者係以實用掛帥嘅MPV外，當然唔少得重有向來備受車迷注視嘅概念車系列啦！不如𠵱家就一齊嚟先睹為快，睇睇其中幾款新車啦！
記者：鄭達基
響今屆車展會場上，平治廠方將展出SLKFinalEdition，雖然造型大致上與現有型號相近，但就改換上全新電鍍銀色鬼面罩，以及16吋五幅式跑車合金胎軨等等，再配以原有電動硬摺頂配搭，從而令其跑車形象完全表露無遺。車廂方面，一雙跑車座椅除屬新設計兼用上Nappa真皮縫製外，而且重備有黑色或紅色供選擇，絕對稱得上係好坐又搶眼呢！
車內亦有不少地方鑲有銀白電鍍裝飾，同樣吸引度十足㗎！預期新車可望於今年3月推出。
由AMG所改裝嘅平治汽車，向來都係車迷至愛，而今回響車展上展出嘅CL65AMG，相信一定會將喜愛高性能跑車嘅車迷，深深咁吸引住呢！點解？原因好簡單，就係因為部車本身，配用上一台由S-Class移植過來嘅5513ccV12引擎，並將容積增加至5980cc及經AMG精心調校。
另外，再附以Twinturbo裝置，從而令馬力輸出激增至612匹，而扭力輸更錄得102.0kgm/2000rpm嘅驚人數值；廠方更為其安排有一套5前速Speedshift半自動波箱，無論起步加速都有出色表現外，就連0至100公里加速度僅為4.5秒（預計數據），而極速更可高達250km/h（有限制）咁快啦！然而，雖然廠方未有發布新車車首造型相片，但從車尾望去已估計到其造型，會與現有CL55AMG型號相近，同樣以高性能跑車形象掛帥呢！
早已備受車迷注目嘅福特FocusMPV，終在今屆日內瓦車展會場上正式曝光，廠方並將之定名為FocusC-MAX；同時，廠方又認為新車無論舒適性、給予用家嘅信心，以及路面操控性，都能夠達到一眾用家嘅最高要求。
新車造型除流露有Focus嘅影子外，低重心車廂設計亦能方便乘客進出車廂；而流線型車身設計，亦令風阻系數僅得Cd0.29，對降低耗油量及行車時所帶來嘅風噪都好有幫助。車廂空間充裕之餘，座椅布局亦見靈活多變，可按需要將座椅收摺放平，以增加尾廂載物容量；設備配搭亦見齊全，除電窗、電鏡及原廠冷氣外，廠方更會為FocusC-MAX加配一套高級音響，從而令享受程度進一步提升呢！至於機械配搭方面，新車將會配用一台屬最新設計嘅1.8公升DuratecHE引擎，馬力輸出數值為120ps/6000rpm，扭力則為17.2kgm/4500rpm，用作日常代步絕對能應付裕如。
德國歐寶車廠亦不甘示弱，除會展出旗下最新款Signum豪華轎車，以及配用上一台Turbo引擎嘅Speedster開篷跑車外，重會展出全新GTC（GranTurismoCompact）概念跑車。
呢部概念跑車嘅造型，絕對稱得上係圓渾有致，望落好有跑車Feel之餘，同時亦能有助降低風阻系數，從而有助降低耗油量及增強性能表現呢！車廂配搭亦擁有全新配搭，乘坐空間寬敞闊落舒適之餘，真皮座椅布局亦見有一份豪邁觀感。
雖然廠方未有公布關於此車嘅詳細機械配搭資料，但一套跑車化懸掛組合，可有助增強路面操控性呢！