樂壇有一個成日話自己失戀嘅男歌手，其實佢𠝹女好有計仔㗎。自稱𠵱家冇拖拍嘅男歌手，原來同某女歌手發生過一段地下情。
馮仁昭聽講男歌手追女歌手嗰陣時，因為女方家底唔錯，所以佢媽咪一直都好反對佢哋嘅戀情。男歌手為咗追得美人歸，出盡冧功，又成日對女歌手自稱暗戀咗佢好耐，搞到女歌手終於動晒心。
不過呢對小情侶最終都經唔起考驗，男歌手開頭追女歌手嗰陣就好鬼落力，乜嘢法寶都出齊，但係同佢分手嗰陣，男歌手就好唔負責任，粒聲唔出就失咗蹤，交代聲都冇，所以佢哋分手之後就猶如陌路人啦！
好彩女歌手𠵱家搵咗個年輕有為嘅男友，感情好穩定，男友錫到佢燶，所以話塞翁失馬，焉知非福！
蒙嘉慧噚日喺將軍澳電視城化妝間，準備拍攝《陀槍師姐IV》外景。佢喺農曆年前因為急性盲腸炎兼撞傷下巴入院，𠵱家已漸漸康復，不過醫生話佢個傷口復元得比一般人慢，所以𠵱家佢大動作啲，個傷口都扯住痛。大病一場令蒙嘉慧得番一百零三磅，佢希望可以增肥到一百一十磅，不過最令佢激氣嘅係保險公司唔承認佢下巴嘅傷係意外，所以唔賠足畀佢。
今晚陳奕迅（Eason）就喺紅館舉行尾場個唱，梅艷芳、鄭伊健（左）同梁家輝一家四口前晚就到咗紅館捧Eason場。阿梅同伊健坐埋一齊，重好鬼好傾。
梁家輝早前停咗牌，前晚八點幾，佢同老婆及一對孖女齊齊坐保母車到紅館，一家四口睇Eason嗰陣，重睇得好投入㖭。
噚日地產界有消息傳出，新人趙頌茹（阿Yu）最近買咗薄扶林新樓盤貝沙灣，馮仁昭知道貝沙灣係豪宅，閒閒哋一個單位都要成四百幾萬，估唔到阿Yu出道冇幾耐就做富婆。不過，阿Yu嘅唱片公司方面就話冇聽過呢件事，而且買樓係私人嘢，佢哋唔方便問咁多。
日前有份同廖創興太子爺廖堯城食飯嘅熱情台灣女化妝師李天藍（Bleu），傳聞佢同過好多名人同名星化妝，其中一個係東亞銀行主席李國寶。不過東亞銀行企業傳訊部發言人SalinaTong噚日就替李國寶澄清，話李天藍小姐從來冇幫過李國寶化妝。
