香港葯業（182）去年年底兩次想批股集資，但結果都以撻Q收場。隻股噚日晏晝失驚無神有沽盤湧至，引發股價急跌57.46%，似足笨豬跳，真係睇見都心驚。
香港葯業早上重好地地，下午甫開市就急跌，最低見0.28元，一度抽回0.30元樓上，但終於以接近全日低位0.285元收市，成交股數1692萬股，金額622萬元。
經紀陳話，香港葯業爆煲幾乎係意料中事。記得舊年隻股分別在10月同11月，兩次想話配股集資，但收尾都係講唔掂數拉倒。當時有人預先揸重貨，準備迎接呢個大行動，但兩次配股都最終告吹，有關人等一直散唔到貨，兼且有人重四圍按倉，所以一有風吹草動，證券行馬上斬倉沽貨。
隻股舊年曾獲一家歐資大行青睞，為其寫報告又搞路演，但始終把握唔到時機成勁配股，其實非常可惜，家陣重要玩笨豬跳，真係冇陰功。
慕容小初