同行如敵國，果然冇講錯。大地產商恒隆主席陳啓宗噚日喺佢揸弗嘅亞洲協會午餐會，講起近日豪宅市場熱鬧情況，佢話供應好多，估計今年樓價冇得升，近日出現數十個成交個案只係一啲港資在炒作而已。
但講到恒隆旗下嘅豪宅君臨天下，佢就話唔同，因為擁有無敵靚維港海景，起碼比起附近樓宇至少貴一兩成，內部認購名單已經排得長長，實情係皇帝女唔憂嫁。咁同李澤楷個貝沙灣點比較？佢話兩者基本上唔同貨色，唔可以直接比較，重反問八方貝沙灣喺邊？當年十大地產商聯手反對批地建數碼港貝沙灣，陳老闆都好似有份，咁快就唔記得？
對於財爺下個月公布財政預算案，佢叫大家唔好抱咁大期望，因為咁嘅全球經濟環境，諾貝爾經濟學得獎者嚟搞都無符，大家唔好以為政府萬能！
傳真︰2623-9278
電郵︰