新樓盤忽然又爆減價戰，主角唔單止有地產公司，亦有電盈（008）在內，結果電盈跌得多過地產股，收5.55元，跌幅5.1%。
電盈最熱門嘅Call輪9637，有85球易手，輪價由8.5仙散落26%。隻輪11月到期，行使價7.40元，正股𠵱家低過行使價1.85元，隻輪非常價外。電盈下月20日派成績表，上半年已經蝕咗7.13億元，成績好難令人滿意，加上大東單嘢影響形象，又有Reach唔知會唔會撇帳，短期內都好難有運行。電盈Call輪，咪貪平博反彈。
電盈Call輪9639同9641，分別下瀉50%同40%。9639已經到咗1仙地步，溢價41%；9641收1.8仙，溢價46%。有呢兩隻輪在手者，最好沽得就沽，否則要打定輸數。
恒指散139點，恒指窩輪繼續成為最多成交嘅窩輪，10大金額中，恒指輪佔7件，共計2.7億元，幾乎佔大市總成交5%。恒指散，升嗰批自然係Put輪，跌嗰批自然係Call輪，大市反覆，受新聞同美股變化左右，細注低買高賣，或者做吓即日鮮無妨，但切忌大注。
恒指輪好多隻槓桿率超過20倍，1日之間升跌講緊20%，心血少啲都受唔起刺激嘅，最好暫時咪玩住。
章盛