電盈（008）近期衰嘢一單接一單，直情未停過，而且次次都大大鑊。噚日失驚無神又話要為Reach撇帳83億元，撇剩40億元，Telstra更將Reach投資價值盡撇。換言之，電盈隨時可能話又要撇多40億元。電盈利淡消息層出不窮，投資者真係俾佢激暈。噚日撇帳消息一出，其他電訊股亦遭拋售，大市跌139點，收報9250。
亨泰（197）宣布配售7500萬股，最多可加碼至1億股，每股0.59元。包銷商漢宇融資只需盡力按基準配售。隻股噚日復牌，約有6710萬股唔經自動對盤上板，每股成交價0.59元，反映亨泰今次配售行動完成得七七八八，包銷商沽貨壓力估計唔大。亨泰噚日復牌只係微跌3%，收0.65元。今次配售主要由4名承配人接下大量股份，估計再經過一輪收集後，重組攻勢並唔困難。
香港葯業（182）噚日大跌57.46%，收報0.285元，成交達622萬元。黑客話，據聞有大戶被證券行斬倉。此股於去年第4季洽談配股予獨立第三者，股價一度托上0.80元水平，其後雙方傾唔掂配售價，結果配股計劃告吹，股價其後反覆回軟，在0.70元以下徘徊。早前為炒配股揸重貨嘅炒家，一直捱到𠵱家，但最終都要俾證券行迫倉。
阿虎真係慶幸有線寬頻（1097）沽得快，前日已經跌近5%，噚日再跌多9.3%，兩日累跌13.7%，收報2.20元。里昂慌死有線跌得唔夠多，出多個報告話有線只值1.50元。有線俾歐資大行唱淡，噚日又見高盛為主嘅美資大行力沽，有線股價何時跌定，真係好難講。
阿虎