鴻運地產倒閉餘波未了，公開話俾八萬五政策累死嘅鴻運董事總經理田國強噚日喺商台《風波裡的茶杯》節目中流下「男兒淚」呼冤，當眾發誓自己絕無中飽私囊吞咗二千萬佣金。
鴻運倒閉後拖欠二百個經紀嘅佣金未找數，噚日幾個經紀終於忍唔住打電話向鄭大班投訴，爆料話舊年珀麗灣等幾個新樓盤嘅地產商已經將二千萬佣金交晒畀鴻運，但係鴻運一直用各種理由拖住班經紀唔分佣，直至倒閉前一日重聲稱已計好晒數，呃佢哋繼續做貝沙灣個盤，佢哋要求田國強交代嗰二千萬去咗邊。
田國強其後主動打電話畀鄭大班，重喺電話度幾次激動到泣不成聲，佢解釋話所有佣金都用晒嚟還債，自己都係有時有糧出有時冇。
無論誰是誰非，勞工處話會調查鴻運有否涉及欺詐或者非法資金轉移，一定會查個水落石出。
（圖）鴻運倒閉後拖欠二百個經紀嘅佣金未找數，董事總經理田國強發誓話自己絕對無中飽私囊。
傳真︰2623-9278
電郵︰