古天樂和陳奕迅接拍了陳慶嘉執導的三級電影《豪情》，內容講述兩人大學畢業後創立了成人刊物，成為性書大亨。女主角人選有何韻詩、周麗淇、應采兒和谷祖琳，除了其中一人飾陳奕迅女友外，其餘都是扮演較有發揮的舞小姐角色，故四人都爭相做「雞」。
在下月中開拍、由陳慶嘉執導的三級電影《豪情》，已決定由古天樂和陳奕迅（Eason）演出，故事講述這兩位大學生畢業後拍檔創業，最後決定出版色情刊物，該雜誌十分暢銷，結果兩位大學生成為性書大亨，而荷李活早年亦拍過同類型題材的電影《性書大亨》。
同大批裸女做戲
由於片中涉及不少聲色犬馬和燈紅酒綠的場面，故兩位男主角除了有不少粗口對白外，還要跟裸女做對手戲，對於古仔和Eason來說，今次的演出肯定是個大突破。而女主角方面，據知已有周麗淇、應采兒、何韻詩和谷祖琳四位人選，除了一位是飾演Eason的女友，其餘三位都是飾演舞小姐。由於舞小姐角色發揮較大，所以四人都極力爭取演舞小姐。
身在內地的陳慶嘉昨日在電話中說：「我同搞成人雜誌嘅人傾過，我哋攞佢哋當年創刊嘅精神，跟住再改編。」
近期忙於為新唱片錄音的古仔，除答應演出此片，更首次落實為電影擔任監製，他昨日接受電話訪問時說：「收到呢個劇本嗰陣真係嚇咗一跳，因為部戲有好多粗口對白，又多大膽場面，經理人初時都擔心個角色對形象唔好，但我自己就覺得個角色以前未做過，對我嚟講應該會有挑戰性。」
唔驚女觀眾反感
古仔續說：「呢套戲最有趣嘅係讀咗咁多書嘅大學生，之前冇諗過會做呢行，之後又遇到好多尷尬嘅事。套戲嘅賣點唔係色情，好似《色情男女》咁，雖然有裸女場面，但唔係賣弄色情。我今次呢套戲唔會侮辱女性，所以我唔擔心會惹人反感，反而覺得應該有發揮。」
至於古仔之所以任這部戲的監製，原來是得到導演陳慶嘉和監製錢小蕙鼓勵，他說：「原本我係好想試吓做導演，但好多朋友都勸我唔好，不過我對電影幕後嘅工作幾有興趣，所以想親身體驗吓做監製。」
雖然片中有不少大膽暴露場面，但古仔強調說：「其實我喺部戲度唔使應付床上戲，至於因劇情需要而講粗口，我就覺得冇所謂。」
「有冇得睇裸女？」
監製錢小蕙昨日在電話中證實此事，她說：「部戲係落實咗古仔同陳奕迅做，但我希望部戲可以保持一定神秘感，所以現階段唔想講咁多。」
而Eason昨日接受本報電話訪問時則說：「因為我呢排忙住做演唱會，所以只係睇咗個故事大綱，詳細劇本未收到。我知入面有粗口對白，但唔知使唔使我講，亦唔知我係咪有得睇裸女，我覺得個角色幾得意，等我完成咗聽晚最後一場演唱會，會再同導演詳細傾吓個劇本，揣摩吓個角色。」
採訪：陳月媚
