大公司要員工考英文試IELTS，各位打工仔如果將來冇呢張沙紙，搵食絕對唔容易，大學生唔考嘅話，求職時分分鐘俾人懷疑：「你啲英文掂唔掂㗎？」
我哋自細考慣試，考咪考囉，坊間一定好快有IELTS天書出版，亦肯定有IELTS補習班，食頭啖湯者，應該幾肥，睇嚟啲補習天王可以磨拳擦掌落訂單買新款波子矣。
成日話人英文唔好，自己啲英文又如何呢？○三年二月號嘅《傳媒透視》（港台出版，總編輯AmySo）有一篇英文文章，作者PerryLam，題目係EnglishStonesandGlasshouses，一望而知係借用英文諺語Thosewholiveinglasshousesshouldnotthrowstones（其身不正勿鬧人）。呢位林先生認為有啲人日日鬧學生英文唔掂，其實冇檢討自己啲英文掂唔掂，佢舉第一個例子就係田北辰擔任主席嘅「語常會」。
最近語常會發表諮詢文件，第一頁，第一段嘅英文已經好唔掂，寫得曳。林先生又舉《南華早報》一段新聞（一月二十五日）、一段社論（一月二十五日），舉例說明乜嘢係「壞英語」，更加示範改文，將「壞英語」改為「可接受嘅英語」。
幾十年來，香港嘅英文老師都要求學生最遲F.4起就要睇《南華早報》學英文，《南早》啲英文唔掂，香港學生點會掂呀？語常會啲英文寫得曳，田二少又點樣以身作則呀。睇嚟為語常會寫諮詢文件嘅官員、《南早》編輯，都要考番張IELTS沙紙先。
（按：老師請以PerryLam文章教學生，功德無量！）