香港警察交通部所用嘅巡邏車款，相信大家常見嘅都會係福特Transit或Mondeo旅行車，又或者係充當隱形戰車嘅豐田Camry及富豪S70；不過若大家日後響街上，見到一部貼有警察字樣嘅福士Passat旅行車的話，絕對唔使「大驚小怪」，因為警察交通部已選用全新福士PassatVariant2.8V64Motion作為最新款巡邏車，而且重開始陸續交車㖭！
在港投入服務嘅福士PassatVariant2.8V64Motion警察交通部巡邏車，除車身貼有警察字樣外，車頂亦會安裝有長條形嘅警示燈號，從而令人一望而知其身份；車廂空間亦見闊落，不單止能夠載運五名警員（連司機），闊落尾廂空間亦方便擺放執勤時使用嘅器材。至於機械配搭方面，呢批新警車皆以一台2.8公升V6DOHC引擎作動力核心，馬力有193ps/6000rpm，而扭力輸出亦高達28.6kgm/3200rpm，響一套5前速手波輔助下，難怪0至100公里加速度僅需8.0秒，極速更高達232km/h！另外，新車重備有福士獨有4Motion四驅系統，就連懸掛系統亦經過跑車化調校，絕能令新車有更佳路面操控性，加上其他電子系統如ESP、ABS、EBD及EDL等等嘅輔助，亦能為車上警員提供有更佳保護性。睇嚟當呢批福士PassatVariant2.8V64Motion警車全數投入服務後，一班飆車族真係有難喇！