唔係誇張，每次聽見希比亞呢個名，我求大俠都會肅然起敬。呢個芬蘭鐵衞不嬲畀人感覺係好少缺陣，落得場就永無欺場，唔單止咁，前日佢重幫利物浦一腳射垮歐塞爾。佢今次入波，令又單刀失機嘅敗家仔奧雲更冇面。
印象中希比亞除咗幾個月前喺聯賽對新特蘭嗰場休戰外，場場紅軍比賽都有佢份，而且防守水準算穩定，好似前日有球波控甩俾人攻門都只屬偶一為之。
呢場對歐塞爾，唔知佢係咪見到前面幾個隊友唔爭氣，射極都唔入，於是殺得性起上前助攻，果然一擊即中。利物浦搵魯殊訓練奧雲射波效果麻麻，唔啱叫奧雲向希比亞請教射術啦。
前日歐洲足協盃有八場波，偏偏梳打埠大莊好巧妙咁開少場波圖對丹尼斯尼士邦嘅比賽。老實講，波圖都叫有啲機會睇吓，如果有開盤我諗好多波友會好似我求大俠咁諗，憑名氣合埋眼敲波圖上盤。果然波圖贏夠六個一皮。唔開盤等你無得賭，當然有原因啦。
受到流感侵襲嘅祖雲達斯，今晚要喺中立場鬥科木。我求大俠知道佢哋至少重有四至五件病人唔踢得，而無病嘅又啱啱同曼聯激戰完未回氣，唔怪得我哋波王都搵科木做全日心水。我諗唔少波友都想知邊個祖雲達斯球員先發病，搞到病菌擴散，答案：祖利安奴是也！
同文仙尼一樣，車路士前鋒哈索賓基又彈主場（史丹福橋球場）嘅草地唔掂，直頭話衰到好似踢沙灘足球咁。不過我求大俠覺得車路士同拉素個case啱啱相反，拉素主場戰績就唔好，車路士主場成績就鬼咁勁，佢重有咩好怨？自己小心啲唔好受傷就算啦。
拉素教練文仙尼早幾日至彈過奧林匹高主場嘅草地好唔掂，如果可以揀寧願將主場比賽移師去欖球場。話口未完，拉素前日喺歐洲足協盃又喺主場失威，幾經辛苦至同克拉科夫言和，累埋捧場客。文仙尼賽後又怨佢哋今季主場真係衰過作客。咦，嚟緊禮拜日拉素又主場對阿特蘭大喎，唔知呢次又會唔會……。
新特蘭今晚同米杜士堡進行打吡戰之前，又傳出不利消息。盛傳佢哋班波重負債二千幾萬鎊，無論球季餘下時間踢成點，到季尾都被迫嚟一次大清洗。消息一出，睇怕陣中好似費奧呢類高薪球員即時心寒，會唔會影響落場比賽心情？今日就知。
逢周六、日見報