做藝人為咗保持形象，好多時都未必可以同人講真心話，日本女星米倉涼子上星期聽到一齊主演古裝劇《武藏》嘅男主角「武藏」市川新之助，俾人踢爆有私生女之後，即刻同佢劃清界線，公開向傳媒表示自己同市川純屬朋友，不過今期《Friday》就偷拍到兩人秘密約會嘅照片，米倉都可算係口不對心囉！
《Friday》嘅狗仔隊，上月中喺市川新之助位於東京嘅住所附近一個公園入面，發現米倉同市川擁抱；兩個星期之後，佢哋又喺米倉屋企嘅停車場，影到呢位靚女同市川喺架車入面親熱。
我羅拉覺得米倉同市川邊似普通朋友咁簡單呀，《Friday》雜誌話有電視台工作人員爆料，兩個人舊年喺惠比壽一間bar一齊過聖誕，重有人見過佢哋兩個得閒就撐枱腳㖭，鬼咁甜蜜。
對於雜誌有證有據話米倉涼子同市川新之助有嘢，佢哋兩個所屬嘅事務所，當然照例否認兩人拍拖啦，不過睇嚟呢段時間米倉一定會俾日本傳媒窮追不捨。