姚樂怡跟商界男友Anthony拍拖兩年，樂怡說男友又癲又八卦，二人的脾氣均屬炮仗頸，但猶幸爭拗後很快又回復甜蜜，樂怡還計劃兩年後與男友拉埋天窗呢！
姚樂怡和男友Anthony下月便拍拖兩年了，兩口子感情發展一向穩定。
日前樂怡在尖沙嘴接受本報記者訪問，問到Anthony曾否向她求婚時，樂怡雖未有正面回答，但卻笑不攏嘴地說：「佢幾時都ready㗎，雖然𠵱家大家相處得好開心，但我估計起碼兩年後先諗結婚。」
不過樂怡表示與男友間中會有爭拗，拗到火紅火綠時，雙方一定各不相讓，可謂火星撞地球，她說：「我哋兩個嘅性格太似，大家都脾氣暴躁，又要撐，唔認輸，咁咪成日發脾氣，成日拗囉，有時都企到好硬㗎，但我哋唔會搞到好僵嘅，食完餐飯就冇事咯。」
在樂怡眼中，男友Anthony有很多優點，她雖說男友性格八卦，實際卻帶給她不少資訊和樂趣。
樂怡笑說：「好似早兩年我同爹哋夾份買咗一個喺窩打老道嘅單位，我負責畀首期，爹哋就負責供，我男朋友就乜都八，乜都要識，佢走去研究地產，佢同我講話層樓會跌價，好彩我聽佢話賣得快，雖然蝕咗些少錢，但如果唔係，我諗自己都要申請破產呀。」
樂怡續說：「我早排住間屋風水唔好，佢又走去學風水，學紫微斗數、鐵板神算，佢好癲㗎，但佢又幾好笑嘅，乜都要爭住學一餐。」
採訪：朱芷瑩
攝影：林德雄
服裝提供：Guess
場地提供：ATouchOfSpice
化妝：Bobo（OasisBeautyImageWorkshop）
髮型：Andy（HairCulture）
