恒地九龍塘對衡道九號豪宅最大嘅A屋，實用面積六千五百呎，計埋天台同花園，足足有八千六百幾呎，間屋咁大，究竟入面有啲乜？除咗基本間隔廳房外，重有部𨋢、有間雪茄房同貯酒房。
另外，四層樓共有七個浴室，其中一個用玻璃間成嘅套房浴室，實用面積有二百呎。呢個尺碼，足有一個九龍灣淘大花園或得寶花園咁大，不過，人哋包埋廳房廚廁。
可以想像，呢個豪宅浴室有幾大，大到個浴缸可以放正中間，兩邊重有成呎闊，加埋企缸同巨型毛巾櫃，重好鬆動。
浴室另一個特色，就係浴缸對上嘅天花板，開咗個小天窗，呢個設計真係幾特別。
長實天水圍慧景軒，噚日開放餘下嘅兩個示範單位，特別喺售樓處騰出地方，擺放各式玩具畀小朋友玩，認真照顧周到。賣樓之餘，兼做埋保母，幫準買家照顧埋小朋友，咁啲爸爸媽媽就可以好放心咁慢慢睇示範單位！
慧景軒售樓處重有迷你影院，昨日率先播放廣告，而同系嘅畢架山一號，今日都開放示範單位嘅百老滙環迴立體聲試映院，播放有關物業嘅動畫電影，睇嚟試映院已成為長實新盤的宣傳必殺技。畢架山一號之前就話邀請NuConcepts提供家具配襯服務，聽講話老闆朱家鼎，今日會到場做嘉賓。
近排豪宅新盤熱賣，皆因發展商一窩蜂推出手上豪宅。講得係豪宅，自然要鬥「豪氣」，不惜大灑金錢做宣傳，目的顯而易見，就係要吸引市場注意。早輪電盈基建主席李智康，就親赴歐洲，搜羅古董擺設，放喺薄扶林貝沙灣。新地喺九龍區嘅何文田山一號，手法相近，同樣擺放古董陳設喺示範單位。
何文田山一號現址嘅花園位置，新地放咗兩部古董名車，分別喺1924年嘅雪鐵龍（Citroen）5CV及1931年嘅福特（Ford），展覽到今個禮拜日。發展商標榜個樓盤用藝術特色ArtDeco設計，現場就展出多個同類品牌珍藏，聽講，購置呢類珍藏已用咗200萬。早前嘉華地產嘅九龍塘嘉皇臺，都試過擺部跑車喺現樓畀人睇，睇嚟呢條橋真係有用。
零的突破，向來唔易。利嘉閣地產最近接連做到幾個第一，例如早前尖沙嘴擎天半島同港景峯嘅第一宗租務、重有擎天第一宗二手成交。
最近佢哋又有另一個第一，就係大角嘴港灣豪庭第一宗租務成交。
聽利記港景峯分行經理姚偉基講，單位係第六座低層B室，面積五百六十呎，以全包月租五千五蚊租出，呎租九個八，將會成為租務市場嘅指標。
中原地產除咗做物業代理，近年搞埋資訊科技，年年都有參加「香港資訊基建博覽」，今年重有產品喺展覽會賣。
原來「掌上中原地圖」，去年底推出嘅燈柱定位方法，𠵱家可以正式應用，凡係有街道嘅地方都可以用到，只要輸入燈柱號碼，就可以查到自己所在。𠵱家到博覽會，就可以買到呢個軟件，盛惠一百八十。聽講遲啲連羊腸小徑、郊野公園嘅燈柱，都可以用呢個系統。另外，中原又推咗個「郊遊版」嘅「掌上中原地圖」軟件，最快年底可以應用。
香港置業喺羊年開始即發圍，代理尖沙嘴擎天半島、深井碧堤半島及屯門翠濤居，成績理想，得到九龍倉頒發「新春銷售大獎」。港置董事胡日發話，嚟緊重會繼續爭取其他銷售獎項，例如恒基下個月二號截止嘅銷售獎。聽講喺下個月港置月會，做得出色嘅同事會有獎勵。
另外，中原攞到擎天半島今年銷售冠軍，獲水晶獎座。
蘭西
電郵地址：
