阿仙奴領隊雲格教波叻就人都知，但弊在份人鬼咁師奶，買個球員都左度右度，卒之搞到隊波喺下個禮拜作客阿積士場波，要搵個兩個𡃁仔做正、副選龍門。
阿仙奴嘅正選龍門施文喺禮拜二對阿積士場歐冠盃整親屁股，除咗踢唔到禮拜六對曼城場超聯之外，連下個禮拜三場歐冠盃都唔使預佢。施文今次傷一傷就影響大囉，事關阿仙奴個後備龍門沙賓因斷腳而要提早收「咧」，而新簽返嚟嘅禾武斯又因為之前替朗斯踢過歐洲賽，所以今屆唔可以代表阿仙奴踢歐冠盃。
咁阿仙奴下場對阿積士，雲格搵邊兩個球員做正、副選龍門呢？之唔係第三號龍門泰萊同只得十八歲嘅荷路威囉。
講真呀，如果雲格唔係死攬施文唔放同埋喺當日唔係左揀右揀（連巴西龍門馬高斯、英格蘭龍門馬田同挪威龍門巴特臣都斟過），阿仙奴𠵱家都唔會搞成咁。但係話時話，泰萊喺歐冠盃（上屆同今屆）嘅腳頭幾好，兩次後備入替都冇失波，而打正選個場重幫球隊以三比一贏咗祖雲達斯㖭。唔通阿仙奴恃住有呢個福星高照？
湖人同火箭噚日齊齊贏波，𠵱家喺西岸第八位叮噹馬頭，不過高比仔近排着晒火，帶領湖人喺過去十一場贏咗九場，睇呢大有機會放甩火箭，甚至超越第七位嘅太陽。講起太陽，近排愈打愈唔掂，近四場輸咗三場，𠵱家只喺領先火箭湖人兩場，隨時連火箭都過埋佢哋，被踢出季後賽。
禾夫斯堡雖然有艾芬保、基利莫域斯同蒙迪安奴等球星壓陣，但名副其實係門口狗球隊：主場就鬼死咁勁，但作客就鬼死咁差。佢哋禮拜三喺德甲聯作客輸畀慕遜加柏之後，𠵱家嘅作客聯賽成績係一勝二和八負，喺作客聯賽榜排尾三。若然佢哋唔係主場打得好，𠵱家肯定要打護級戰。唔好話我求大俠唔教精各位球迷，下次禾夫斯堡作客，記得捧佢哋對家嘞！
西甲啲正選陣容不嬲都唔準，禮拜日嘅奧沙辛拿挫皇馬就因為咁搞出個大頭佛。話說奧沙辛拿嘅簡斯度正選上陣，但當地講波佬話佢因為通過唔到酒精測試冇上陣，搞到簡斯度火滾，話要告嗰個講波佬。我求大俠就話矇查查啫，但係錯成咁就真係好少見，算簡斯度唔好彩啦！
有睇過舊年世界盃嘅人應該對巴拉圭國腳居華斯有啲印象，呢位效力河床嘅前鋒對斯洛文尼亞時後備落場連入兩球，有啲名氣。據報話佢將會借去上海中遠，令我求大俠有啲愕然。話晒佢只係二十三歲，年輕力壯，唔知係歐洲球探走漏眼，定係近年阿根廷聯賽出口貨表現麻麻，影響咗佢出路嘞。
逢周一至周五見報