小初上星期四至講過，亞洲鋁業（930）獲芬佬寵幸，在0.67至0.68元接咗3400萬股，稍後必有異動。
不過真係估唔到，打針都冇咁快就見效，亞洲鋁業噚日發力，大升5.26%，收0.80元，成交股數3214萬股，金額2553萬元。
經紀黃話，亞洲鋁業管理層已經出發去歐洲搞路演，所以家陣可能只係熱身，唔排除稍後路演完畢歸來，有消息跟尾，股價再有異動。
小初有多少唔明白，點解芬佬咁獨具慧眼，可以在低位收到貨？經紀黃話，各有前因莫羨人，之前都講過好多工業股都想有基金捧場，皆因一登龍門，聲價十倍，股價可以升到你唔信。芬佬有實力有牙力，自然可以壓價買平貨，普通小投資者如小初之流，就只有得個恨字。
經紀黃重話，接咗亞洲鋁業手貨嘅芬佬，近期沾手嘅股份，大部份都出現爆炸式上升，好似富士高（927）同埋冠華（539）就係好例子，最新一隻就係賣燈嘅瑩輝集團（1163）。
慕容小初