香港嘅堪輿學家，如果出咗名，生意就滔滔不絕，𠵱家咁嘅巿道都唔憂做。早排有兩個堪輿學家嗌交，重做咗娛樂頭條，可見佢哋嘅新聞都好受巿民關注。馮仁昭今次就同大家八吓堪輿學家嘅是是非非。
名相士因為幫好多紅星算命，所以知名度好高，搽粉相士以前同名相士都幾老友，嗰陣大家都啱啱出道，之後隨住大家嘅知名度逐漸提升，佢哋兩個就開始明爭暗鬥，最後搞到冇偈傾。不過，搽粉相士份人為咗利益，就算明明唔妥人都會同人合作。一日，佢同師奶風水師一齊約咗名相士出嚟，話有生意傾，名相士都應承咗見佢。
不過，向來守時嘅名相士嗰日足足遲咗成個鐘，擺到明唔畀面佢哋，嚟到之後，聽完兩個嘅合作提議，即時話：「呢啲咁呃人嘅嘢、搞噱頭嘅嘢唔啱我做，你哋兩個合作咪得囉，啱晒你哋！」名相士講完之後，就行咗去，真係幾鬼寸。呢單嘢之後，名相士同搽粉相士、師奶風水師嘅恩怨就更加白熱化。
姚嘉妮同原子鏸噚日喺中環出席貝佳斯嘅DaySPA開幕活動，姚嘉妮着咗一條側邊綁繩、開窿嘅牛仔褲，佢重話已經着咗T-back內褲打底。姚嘉妮放口風話好想做纖體公司嘅代言人，一來可以免費纖體，二來佢覺得會影到自己好靚，而且佢重話着性感衫都唔怕。不過，佢𠵱家最想就係練到好似安琪蓮娜祖莉咁，成身都係肌肉，但姚嘉妮就好有自知之明，知道自己個胸唔可以好似安琪蓮娜咁大喎！
何韻詩噚日去港台出席活動，佢話師傅梅艷芳前幾日去睇佢主演嘅舞台劇《戀人論語》，諗住會俾人讚，點知反而俾人鬧，佢話：「梅姐話我行路似蛤蚧，重話罰我要夾住雞蛋行路，不過就讚我唱歌幾好。」而阿詩就話自己骨子裏好斯文，唔擺出淑女嘅姿態係驚嚇怕人喎！
江希文𠵱家用番原名江欣慈，以唱作人身份再闖樂壇，噚日佢上咗新城做訪問，佢話喺今個春節同屋企人去咗內地旅行，點知佢媽咪去到東莞時忽然又屙又嘔，江欣慈話：「因為我媽咪腸胃一向唔好，所以我哋唔覺得好嚴重，點知到咗珠海後，媽咪情況仍未好轉，嗰時又有親戚打畀我哋話肺炎喺內地好嚴重，嚇得我哋即刻返香港，最後先知媽咪係食物中毒。」
張鎧潼前晚喺尖沙嘴新港中心嘅一間卡拉OK慶祝生日，出席嘅圈中人有E-kids、陳見飛同Kawaii等，佢話今年生日有咁多朋友陪住，所以特別開心。佢嘅生日願望係想快啲搵番個男朋友，問佢好朋友伏明霞有冇打電話恭喜佢，佢就話同伏明霞已經好少聯絡，但係知好友𠵱家大住個肚，佢都祝福佢！
