投資市場真係情緒化，一時話驚打仗令個市就大跌，一時又話憧憬唔會打仗個市就大升，轉個頭又話最終都會開戰，搞到周三美股回軟，真係俾班美國佬玩晒。港股噚日跟住跌，但跌得唔多，恒指收報9390，跌37點，成交63.68億元。
裕元工業（551）下周二拆細，每手買賣單位亦由1000股減至500股，以噚日收市價28.25元計，1拆2即每股14.125元，每手只需7063元，比起拆細前每手要2.825萬元少好多。裕元拆細，唔使問阿貴都係想搵散戶支持，唔使貨源集中在機構投資者手上。黑客話，裕元近期頻有大手成交上板，加上管理層做足公關工夫，令到裕元甚具炒味，股份就嚟正式拆細，應該要留意。
豐德麗（571）噚日終於復牌，麗展（488）提出以每股0.28元將豐德麗私有化，藉此對銷欠豐德麗的15億元債務。ｉ師傅話，麗展收購價較豐德麗每股資產淨值3.26元大幅折讓逾91%，小股東冇理由唔提出反對，所以麗展極有機會調高收購價，傳聞話0.45元係麗展底線。
豐德麗噚日復牌升22.7%，收報0.27元，距離全購價只有3.7%，上升空間有限，但距離麗展底線則有逾6成上升空間，至於出價底線傳聞係真係假就冇得保證，如果跟炒，大家要執生。不過，若低於0.28元買入豐德麗，博麗展調高收購價，則仍有一定值博率。
萬勝（376）連升3日，累積升幅1.1倍，收報0.21元，成交亦逐步增加。Cookie話，此股獲台資中國聯合電信入股，至今一直進行債務重組，據聞已搞得七七八八，都係發圍時候，不過萬勝最終會點發展，暫時未有詳細計劃，但估計離唔開獲新股東注資。
阿虎