要食得刁鑽，深圳呢塊彈丸之地絕對滿足到你的要求，最近我就發現位於鳳凰路嘅一間食店居然有鯊魚食，而呢幾款鯊魚菜式亦極受食客歡迎，唔少熟客一知道劏鯊就會即刻訂位，務求要即時品嘗鯊魚的滋味。
記者：辛汀、黃希知 攝影：韋信
逢星期一至三、五刊出
每次捕獲鯊魚後，酒樓都會將鯊魚放在門口的魚缸來吸引食客，就好似呢條啱啱捉到嘅鯊魚，有成200斤重，可以滿足到數以百計的食客。每次劏魚都要有多位師傅同時出動先至得，一個攞魚網、一個攞繩，其他人就扶住魚身，手忙腳亂咁同條魚搏鬥30分鐘以上，先可以將鯊魚由魚缸搬出，難怪每次劏鯊都會引來不少路人駐足觀看，亦可藉機招徠食客。
酒樓中廚主管羅炳昭說：「鯊魚全身都係寶，食用可抗癌。一條鯊魚，魚肉清炒、魚肝隔水清蒸、魚鰭燉湯，魚皮用慢火扣、鯊魚軟骨用文火煲煮，幾乎全條魚都有用。」
全條鯊魚最值錢的地方，就是前面左右兩側的大魚翅，最佳的烹調方法就是燉湯，將新鮮魚翅打沙處理過後，整塊連骨配以老雞、金華火腿、赤肉、雞腳等多種湯料原盅燉五個鐘，火候十足，燉出來的湯味鮮甜清香。
「鯊魚皮好似花膠，我希望可以配合鮑魚汁，將整道菜式變得矜貴，做到好似花膠一樣的效果」大廚梁師傅表示。我第一眼望見兩塊淋滿鮑汁的鯊魚皮，驟眼看真的與花膠幾可亂真，鯊魚皮主要靠鮑汁來調味，所以鮑汁十分重要，用金華火腿、老雞、鮑魚及其他十多種材料熬足八個鐘，連同已除去表面幼沙的鯊魚皮扣足一個鐘，鯊魚皮入口質感同花膠差不多，咬落卻沒有花膠般黏口。
鯊魚最高營養的部份便是肝臟，因此這味清蒸魚肝便是最受歡迎的菜式。「將肝臟清蒸便最能食出魚肝的真正味道，把魚肝切片後加上薑、葱隔水清蒸，最能保留魚肝的營養，又夠原汁原味。」大廚羅師傅說。雖然魚肝用薑葱辟去腥味，但我食時仍然覺得腥，不過口感就勁似豬肝，軟腍腍，幾好味。
鯊魚肉烹調方法較多，我自己就鍾意清清淡淡食其真味，就以這道碧綠鯊魚肉為例，以簡單的醃料將鯊魚肉先調味，保持魚肉的鮮甜味，炒前輕輕走油令肉質更嫩滑，加入荷蘭豆炒香，炒出來的鯊魚肉不覺鬆散，口感爽口清甜，與普通較腍身的魚肉很不同。
鯊魚頭三尖八角，邊有肉食？大廚解釋話魚頭主要以厚皮同軟骨組成，燜上半個鐘後，骨頭就會變得脆身，而且對人體骨骼同骨質好有益，而皮就會煙韌彈牙似花膠。香濃紅燒汁是由自家調製的醬汁加上靚上湯熬成，味道濃郁惹味，就算無肉都可以食到津津有味！
當侍應將整碟和味龍放上枱時，只見一隻隻好似曱甴的物體鋪滿成隻碟，經理話這味菜叫和味龍，即是水曱甴，製法簡單，將水曱甴放入滷水汁煮半小時左右就食得。我就最欣賞其滷水汁，聽大廚講是由幾十種葯材調製而成，自家製作，味道較特別，而水曱甴更加有治夜尿的作用。
除和味龍之外，原來重有沙蟲同蠍子食，我較有興趣的反而是來自廣西的蠍子，細細隻賣相不錯，原隻炸到香脆可口後，再加上自己研製的五香味料炒香，香中帶微辣，加上口感脆卜卜的蠍子，惹味香口最適合用來佐酒。
地址：深圳市羅湖區鳳凰路117號
電話：(86)75525525777