蘭桂坊CClub有啤牌局？不過當中全冇錢銀轇轕，但玩者一樣會有勝負贏輸，賭嘅係你嘅口才，重有愛情運數，因為呢鋪牌會畀機會你搵到唔相識嘅另一半，你可能會「贏」得一個浪漫嘅晚上，不幸嘅當然係「食檸檬」了！究竟半張啤牌點樣𠝹仔𠝹女，今晚我哋就嚟一次現場直擊！
記者：朱崇德
攝影：陳盛臣
ImageGirl：Sam
蘭桂坊對正CaliforniaTower地庫嘅CClub，一向以環境夠Mood、音樂夠勁出名；天鵝絨、緞子及毛茸茸大咕𠱸，散滿整張紅彤彤、軟綿綿的長沙發，真係極盡奢華嘅火辣野性誘惑！而且由本周開始，誘惑感覺將會進一步升溫，因為每逢星期三晚，CClub呢度將會搞一個「半張啤牌之夜」，簡單講就係每個男女進場時，都會有機會抽半張啤牌，之後大家當然要在眾裏找尋「另一半」啦！所以逢星期三晚呢度真係差唔多奉旨𠝹仔𠝹女；成功配埋一對嘅，酒吧重好通氣咁每人送一個Drink（紅、白酒或啤酒汽水），真係畀足機會同口實你去識「另一半」啦！
全靠我哋提水，Alan先搵到「另一半」阿Sam，佢膽粗粗走埋去同成班朋友坐喺最尾牆角嘅阿Sam身邊自我介紹，結果？俾人玩！不過笑住嘅阿Sam都同佢一齊去Bar枱換酒，呢個時候就見兩個人都傾得幾投契，Alan終於掂咗。
事後同Alan收收風，佢話：「睇落阿Sam斯斯文文都幾正，配對成功後，酒吧送Drink的確係一個非常好嘅口實，可以俾我哋喺吧枱單獨共處；手提電話已經攞到喇，以後大家會約出嚟飲嘢！睇阿Sam畀唔畀機會啦！」而阿Sam就話：「大家傾咗一段時間，發覺佢對女仔都幾細心！好啦！畀次機會佢……做住朋友先啦！」
Ricky：我一聽到話用啤牌識女仔！馬上去買成副番嚟呀！點知呢度原來將佢剪成半張重過埋膠，真係完全冇得出千；好在當我搵到阿Man時！原來一𠝹已經𠝹到個咁正嘅！早知使鬼諗咁多花招咩！
阿Man：好老實喎！我有男朋友㗎啦！同佢相認都係為咗杯Bonus飲品咋！飲完傾兩句都無妨丫！咪當識多個朋友囉！
MuiMui：好耐都冇拖拍啦！自情人節後都成日落嚟蘭桂坊蒲，咁啱撞正CClub今日搞Function！用半張啤牌識人，真係幾有新鮮感同刺激。間唔中喺附近飲嘢都撞過佢，不過一直唔知佢叫Daniel，今日識咗，咪做住朋友先囉！
Daniel：我早想𠝹佢㗎！原本大家張牌係唔同，好在我成班Friend落嚟，有個中咗！攞到電話，又約到星期尾兩個出嚟飲嘢！咩話！重冇男朋友添呀（小記通水）！嘩！我贏面有6成啦！
唔經Daniel呢啲熟客介紹，都唔知CClub裏面原來有幾間好特別嘅貴賓房，一間就設計到成張床咁，飲嘢時大家完全係瞓晒上去，再加毛毛大咕𠱸同薄紗天花掛布，真係極盡奢華誘惑之能事！另外，呢度重有兩間完全冇燈嘅VIP房，基本每間可以容納到二十幾人，聽講好多「天皇級」明星都嚟過！我重有次喺度撞到牙擦歌手RobbieWilliams𠻹呀！但想坐咁正嘅貴賓房，記住預先訂位。
黑漆漆VIP房一共有兩間，不過都係長期爆！所以都係嗰句，一定要預先訂位！
CClub呢度都幾多特色飲品，好似最近新出咗幾款新雞尾酒，論當中最啃嘅，都係杯SparklingBreezer，基本上佢差唔多成杯都係香檳，再加Medori、Cremedementhe同青檸！杯底再加一粒車厘子，極盡誘惑，攞上手都性感啲。如果想搵杯少少酒精成份嘅，可以試杯Cosmopolitan，全杯大部份以橘子汁、青檸汁、Soda水再加上Vodka製成，酒精含量唔會太高。如果要再少啲酒精，重有杯Miraele同BlueHawaiian，基本大部份都係果汁成份，冇咁易醉！同佢飲幾多杯都冇問題。
要快速打破隔膜，最好和她來個辣身舞。呢度成日都會請一啲世界級嘅名DJ嚟打碟，好似𠵱家個RickyStone，就有14年世界巡迴做DJ經驗，去過嘅地方包括菲律賓、新加坡、東京、澳洲、德國、法國、荷蘭及蘇聯……等等，不下數十個國家；佢最正係打HouseMusic，勁有Feel，第二度未聽過！
CClub
電話：25261139
地址：中環德己立街30-32號加州娛樂大廈地庫
營業時間：
星期一至五（6:00pm至深夜）
星期六（9:00pm至深夜）
鳴謝：新星堡娛樂