香港六大宗教領袖，包括佛教、道教、回教、孔教、天主教同埋基督教，噚日聚首一堂，舉行癸未年新春團拜，撞正陳日君主教為前神父性騷擾兒童案公開道歉，雖然陳主教冇親自到場，傳媒都趁機向主要宗教領袖問反應。
記者問完問題，輪到各大「教主」上台致新春賀詞，多數都係善頌善禱、祝願和平嘅大路言論，估唔到發言最有料嘅，竟然係道教聯合會會長湯國華。一身卜帽長衫、道風仙骨嘅湯會長果然養生有道，九十三歲高齡仍耳聰目明，講到何志平求到「凡事不吉」嘅下籤一事，佢話係上天好意示警，要大家少說話、多做事、戒荒唐、戒躁暴。對於美伊局勢，湯會長更加慷慨激昂，提議六大宗教領袖立即聯名致函聯合國，堅決反對呢場戰爭。
傳真︰2623-9278
電郵︰