李嘉誠噚日現身北京人民大會堂，再捐款四千萬畀教育部，延續已有四年歷史嘅長江學者獎勵計劃。八方冇機會出席，只能透過誠哥嘅公關部取得佢喺會上嘅致辭，內容講及一部書對佢嘅影響，八方覺得一定要同讀者分享。
誠哥話最近睇咗一本名為《淡紫色》（Mauve）嘅書，書中主角貝金（SirWilliamPerkin），係一位將自己發明嘅「苯」創造大量財富嘅化學家，呢位仁兄十六歲時做實驗失敗，先至發明到苯呢樣嘢，一年半後重將佢註冊，苯後來成為染料嘅主要成份，令貝金二十三歲成當代巨富，三十六歲退休，專注搞科學研究。
誠哥覺得本書有一個重要啟示，就係貝金之成功，並非靠幸運，因為佢當時要將一件化學成品變成商品，可以話係排除萬難，所以誠哥認為一個人要成功，必須有「無微不至的洞察力、爭取知識的熱誠、不斷進取的毅力、不怕失敗的自信」喎。
（圖）誠哥噚日戴咗條有紫色點點嘅領呔，夾晒佢推薦嘅書《淡紫色》。
傳真︰2623-9278
電郵︰