新一年財政預算案公布在即，惟恐財爺會響新車身上加稅關係，唔少汽車代理紛紛以優惠價清存貨，以免夜長夢多嘛！就正如福特咁，佢哋部Focus1.6四門同五門版，就由原來12萬幾嘅車價減到10萬上落，而頂級2.0手波版亦由原來接近14萬，減到𠵱家10萬5千幾咋！至於四門轎車嘅Mondeo，標準版賣開17萬9千8，但家陣不過賣13萬9千幾，便宜咗成4萬咁多，既有16吋合金軨、又有電天窗、軚盤遙控裝置同駕駛席電控功能；另外，至Top嘅MondeoSuperDeluxe版亦由原來19萬3千幾，減到唔使16萬，既有全車皮椅、Xenon頭燈，又有全方位電控駕駛席同六個安全氣袋㗎！真係有買趁快喇！
減價風潮一浪接一浪，連帶歐洲車一哥嘅平治亦加入戰團；剛於去年下半年才引入嘅Facelifted新版S350L長陣版房車，原價賣94萬4千，但𠵱家現貨價不過賣89萬9千咋！足足便宜咗4萬5千咁多。但最吸引買家莫過於至Top嘅S500L長陣型號，原來賣開113萬9千，但現在只係定價105萬咋！差額有成接近9萬蚊咁多，想擁有一部咁豪華嘅S-Class高級轎車，你又點可以放過眼前嘅機會呢？據知代理手頭上現貨有限，係啱嘅就真係要行快步喇！