沉寂一時的幪面超人，在日本推出新一輯《龍騎》出乎意料受歡迎，依照傳統，《龍騎》又乘勢推出新公仔。推出近月，坊間看來公仔銷售情況一般，不知是Fans未熱身搶購，或是其吸引力已減退，與過去的難以相媲美。相反，二手幪面超人，如七十年代款、超合金甚至Q版限量版，近期卻多人搜尋，交投熱鬧。歸根究柢，全因《龍騎》出現掀起各人懷舊情緒。
記者：梁佩芬
攝影：陳盛臣
88年賣八十蚊的玩具，到今日可以升到千三蚊，一樣好賣所剩無幾，市場上膠玩具只有收藏意義，講到保值能力，超合金製成品才有此能耐，可惜成本高，日本已甚少推出超合金，就算有都係MadeinChina，要尋回這些珍品，荷包就大損；而且，回收價還可達四百，都無乜邊樣可媲美。好似這個「映月」，玩具新淨，手肘位的刺都未貼上去，完全未玩過，最緊要還是日本製造。
二手：$1,350（a）
原價：$80
回收：$400
因為《龍騎》推出的熱潮，沉寂一輪無買的梁榮忠又再度出擊，他聲言是受卡通片影響，又再度瘋狂逛玩具舖。當然新貴《龍騎》古迦早已買到手，他卻要搵回93版的ZO電單車隊系列，全套五隻，當年一出就斷市，今年二手市場都所餘無幾。
二手：$550（a）
原價：$150
回收：$200
原本大膠公仔不是太受歡迎，不知是阻碇定或造型太過笨拙，不少人都只收埋喺床下底。但數年前，作者石之森章太郎去世，幪面超人玩具忽然當炒，連帶這類50厘米高的、乏人問津的大膠系列都一併當旺。以二手市場來說，這個產量一般的大膠系列，算是超合金以外，最有價值的。
二手：$1,200（a）
原價：$200
回收：$400
真奇怪，日本方面《龍騎》咁受歡迎，但出公仔就好似唔多掂，唔知係年紀尚輕唔值炒，抑或貨量太多造成滯銷，定或香港尚未正式放映，個勢未去得太盡呢？
二手及原價：$65（a）
回收：$20
上年喺日本7-11的限量版樽蓋，要買可樂才可抽的扭蛋公仔，全套十五隻。這個寄賣貨，據悉是物主喺日本辛苦抽回來。
寄賣價：$550（b）
89年推出的BlackRX，是Bandai第一套幪面超人BoxSet，全套十隻。
二手：$380（a）
原價：$150
回收：$100（散收$10/隻）
日本經濟差，玩具生產商瘋狂推出復刻版，以求在Fans身上再撈一筆。這個背脊有拉鏈，一拉就會「咕嚕咕嚕」叫的超人，喺02年再度推出復刻版，曾引來一班二十來歲的後生仔入貨，可惜是，Fans對第二度複刻的玩具興趣日漸減退，未夠半年，已放回公仔舖。
二手：$580（a）
原價：$400
回收：$150
72?3年出電視版時，幪面超人的主角遇事要突然換角，二號演員演出一排後一號又突然復出，變成市面上出現兩個超人。而玩具製造商在製作制服上做了手腳，二號仔（即替身）衫膊頭位有一條間，以作區別。不過，替身二號仔都甚少出公仔，難得搵到Q版，二十蚊貨色，收藏計買得過。
二手：$20（c）
「有新貨就當然要買，最慘要搵舊版玩具，有時真係逐間玩具舖搵都未必有。我都試過放公仔，一來放個價唔高，二來我買得都係最鍾意，唔捨得放。」
「好似我咁年紀嘅人，都係睇幪面超人大，又係細個無錢買公仔，到十年前左右有經濟能力就買番嚟，試過用幾千蚊買番一套超合金，都好肉痛㗎，後來就專買Q版或者中型Size嘅，價錢平啲。最新一套《龍騎》，我都未儲齊。」
「我鍾意電單車隊同扭蛋，大大話話都儲咗十多年，直到1999年，覺得真係有太多種類，屋企又放唔晒，重有啲重複咗，就開始放玩具。Set價前，先去其他舖頭格價，又或者趁有熱潮拎去放。不過，幪面超人都算有市場，全年價錢都差不多，無乜大上落，算係七十年代玩具中，還企得住的一種。」
「最鍾意大膠公仔，不過近年都無乜新貨，可能市場價值不高，所以亦好難搵，但好在其賣價不高，只要搵到啱心水都會入貨。最唔鍾意近年推出古迦嗰期，日本嗰邊要搵錢，大量生產，搞到通街都係，有貨無價。」
a） 玩具跳蚤
電話：28826850
地址：銅鑼灣糖街3號銅鑼灣商業大廈1601室
b） 玩具一番
電話：25279807
地址：灣仔道188號東方188商場261號舖
c） Mr.Toy
電話：90484709
地址：灣仔大有商場222號舖