前日係黎瑞恩三十歲嘅正日生日，佢同老公曾智明一齊去咗老爺曾憲梓九龍塘嘅寓所參加BBQ派對慶祝，唔知佢哋係咪想小恩子個BBcute啲呢？而有份出席嘅，全部都係小恩子嘅親友。啲親友入屋嗰陣，大住肚嘅小恩子重親自出嚟迎接，真係好有禮貌。
問小恩子有咗BB之後有冇唔舒服？小恩子話：「我只係有咗幾個月，𠵱家身體都幾好。」問小恩子有乜嘢生日願望？佢話當然係希望自己身體健康，老公又對佢好啦。至於個BB，小恩子就希望佢活活潑潑、健健康康，咁佢就會開心又放心。馮仁昭見到小恩子𠵱家咁幸福，都替佢開心，不過佢老爺同奶奶一向鍾意低調，相信小恩子將來參與娛樂圈嘅活動，一定會少之又少，歌迷想見到佢，就會難上加難咯！
台灣天后孫燕姿一直係美國樂隊SixpenceNoneTheRicher嘅歌迷，大家更同屬華納唱片。孫燕姿日前便有機會幫SixpenceNoneTheRicher拍攝電視廣告，佢唔單止一早練好SixpenceNoneTheRicher嘅歌，重即時現場演繹兼作埋對白，孫燕姿話：「今次是請導演拍攝我平時聽他們歌曲的樣子。」
黎姿（GiGi）噚日喺屯門拍攝電影《天使死神》外景，同時有一隊DiscoveryChannel嘅拍攝隊同GiGi做訪問，問番佢對爺爺、中國「電影之父」黎民偉嘅感覺，用嚟做專輯。GiGi話好多事都係從爹哋口中知道，無論如何佢都覺得爺爺好偉大。
劉錦玲同李健仁前晚去灣仔會展睇電影《祖與占》首映。劉錦玲近日忙緊學意大利文，佢希望去意大利旅行時，可以發展一段異地情緣。
劉錦玲話：「我覺得意大利文好浪漫，𠵱家我識寫一篇意大利文介紹自己，但希望將來學多啲就去意大利玩，順便識吓男仔。」而李健仁話好友周星馳將會開戲，佢話：「不過星爺啲嘢冇咁快會知，我亦接咗個扮女人嘅廣告。」
六十年代邵氏老牌導演羅臻上個月三十一號，喺美國三藩市因心臟病逝世，享年八十二歲。羅臻喺六一年加入邵氏做導演，同李翰祥、岳楓同陶秦被稱為四大王牌，執導作品超過三十部。當年佢同狄龍、汪禹、邵音音都有合作過，九十年代就同妻兒移民咗去三藩市，佢同邵氏啲人都好少聯絡，不過邵氏對佢嘅死都深表哀悼。
余文樂同Cookies成員Stephy同Miki等，噚日喺銅鑼灣拍電影《百份百感覺2003》，不過余文樂嘅心情就好差，連影相都黑面，又拒絕接受訪問。監製雷宇揚話戲中余文樂會同Cookies兩位成員Stephy同Theresa有咀戲，問Stephy會唔會緊張？佢話：「到時要嘅話可能會借位。上套戲同陳冠希有輕吻，好緊張，今次都會緊張。」Stephy同余文樂、陳冠希都合作過，問佢邊個好啲？佢話：「兩個都係好認真嘅演員，雖然兩個做法唔同，但都係好好。」
