俗語話有心唔怕遲，十月都係拜年時，八方相信唔會有人到十月都重搵人拜年，但中小型企業聯合會會長佘繼標可能係例外，身兼觀塘區議員嘅佘生，噚日正月十九忽然喺牛頭角周街派利是兼議員工作報告，雖然只係一張花蟹，但係都有幾十人圍住佢𢭃利是。
不過有街坊指佘繼標可能參選區議員，周街派錢有收買選民之嫌，八方問佘繼標，佢話由年初一派到𠵱家，街坊、酒樓侍應、民政處職員、區議員等等，識唔識嘅都𢭃過佢利是，絕對唔係要收買人心，「我新年出街一定袋三幾十封利是，唔通有人同你講句恭喜發財，你唔封封利是畀人咩？十蚊一封好少錢啫，我平時都袋幾十個（數十萬）出街啦！」
（圖）一位老伯展示佘繼標派嘅利是同「順手」派畀街坊嘅議員工作報告。
傳真︰2623-9278
電郵︰