公關小YY辭咗職，去瑞士讀酒店管理文憑，學費唔平㗎，一年成四萬瑞士法郎，碰啱呢排瑞郎猛咁升，重更加貴。
小YY去到蘇黎世，轉機飛往日內瓦，再坐火車兩個半小時，到達一個不知名小鎮，坐巴士上山頂，學校就在雪山之上，風景絕佳，小YY提着行李，想起茱莉安德絲喺《仙樂飄飄處處聞》嘅造型，幾乎以為自己到咗仙境旅行。
一開始拖行李通過雪地入宿舍，就知道人在凡塵，因為山頂空氣稀薄，眾學生行多幾步，人人氣喘如牛，覺得啲行李特別重。安頓後入到飯堂食晚飯，小YY重以為身處上海㖭。點解呢？原來飯堂內有近四十個中國學生，普通話響徹全場，小YY自己嗰班文憑班有二十個學生，中國人超過一半，多數來自中國大陸，三個來自台灣，一個（小YY）來自香港。小YY話：「估唔到嚟到瑞士，最常聽到嘅語言就係普通話，一年後畢業，我一定能講流利國語，不過英文唔知會唔會退步啫。」
上堂用英文，山下小鎮居民講法語，唔識聽英語。小YY話佢唔明白點解學校咁多中國學生，其實佢有所不知，中國有十三億人，沿海省份富起來，每十家送一個仔女去外國留學，都足以令外國學校氾濫。澳洲早已睇中呢個市場，猛咁招攬中國留學生，中國人勢將成為國際教育市場嘅最大買家，養活好多歐美澳加嘅私立學校。