情人節啱啱過咗，八方噚日收到大福證券一份報告，原來佢哋透過大福網頁搞咗個調查，發現香港男士今年消費金額比去年少百分之四，平均金額為九百八十一元，女士平均消費七百九十三元，比舊年減少百分之七。
呢個調查有幾可靠呢？據大福講，數據係由市民喺今個月六號至十七號期間登入該網站，提供佢哋舊年同今年情人節嘅消費額，但報告冇提到有幾多人參與調查，不過八方覺得大家都可以視為一個有趣嘅參考。
報告又指，若果同美國相比，香港女士可以話比較慷慨，因為根據當地同類型調查，美國男士嘅消費比女士多出兩倍以上，但香港女士只比男士少百分之二十四。點解香港女士消費力咁高？八方嘅女同事話，佢哋花喺買衫同化妝品嘅錢，絕對唔比男士送花錢少㗎。
傳真︰2623-9278
電郵︰