莎厘娜餐廳老闆王叔真係愈老愈可愛。採訪前跟他通過兩次電話，一次驚一次喜，第一次俾他一輪嘴問我邊間報館，為乜要採訪他，口吻十足差人盤問疑犯。第二次確認採訪時間，他又無厘頭話自己係一個賊，問我驚唔驚，真係俾佢笑死。莎厘娜屹立般含道三十九年，王叔真係帶畀好多人歡樂。
記者：邵超 攝影：陳智良
跟王叔做訪問一點也不容易，難度在於每枱都是熟客，跟每枱熟客傾幾句也花了不少時間，當日有數個不願上鏡的聖士提反女子中學舊生聯誼，王叔跟她們說個不休，拍照、寫紀念冊，差啲以為自己參加了FanClub聚會，足證王叔的魅力。有時食飯，就是食這種和諧氣氛。
莎厘娜初期賣俄國菜，店名是王太改的，多年來是港大及聖士提反學生的高級飯堂，三十多年前賣一份四個幾嘅午餐，到今時今日賣百幾蚊，唔係人人消費得起，以前每次跟念港大的朋友經過莎厘娜，都唔敢推門而入。
「我哋用足材料成本貴，唔想壓低價錢。」
因為以前高級餐廳唔多，王叔話港大學生每逢有賭局，都會話「輸一餐飯輸Czarina」。重有唔少港大男生第一次約女仔食飯都會嚟莎厘娜（去高級餐廳威啲嘛）。王叔二仔Quintin都成日同港大美少女Belinda嚟食飯，之後重結埋婚。
王叔是一個念舊的人，老廚師早已退休，領取綜援過活，王叔知道他無人照顧，讓他三餐都在店裏吃，跟舊同事聊聊天也好過日子。至於要數鎮店之寶，應該是那本紀念冊。自中學以後沒寫過紀念冊，竟然在一間餐廳出現，真係久違了。
「大家都唔係求其寫，係用個心，對呢度無感情寫唔出嘅。」
睇完紀念冊和剪報，發覺大家都好錫王叔，兼且對呢度嘅羅宋湯念念不忘，尤其是聖士提反的學生，好似蘇絲黃、俞琤、吳君如，同埋首批女校男生之一的張永霖，王叔睇住佢哋大，佢哋不時返嚟食餐飯，飲啖湯，同佢敍吓舊。
王叔同客人談笑風生，但係影相係佢死穴，翻開王叔同客人的合照，他的表情都係合埋嘴成一條線。麻煩王叔跟兩個仔影一幅溫馨合照，他對鏡頭的反應好敏感，擺了多個甫士仍然是好似俾人點咗穴咁，最終變成兩個仔笑笑口咁聽佢訓話的樣子。
「我都唔知點解影相就係咁㗎啦，唔識笑。」
王叔現時已將兩間舖（連莎厘娜快餐）交畀兩個仔打理，而且對他們好嚴格：
「我兩個仔，正所謂溫室長大，細嗰個叫咗半年有多，至肯放棄出面開餐廳，返嚟幫手。大嗰個做人唔夠放，留喺英國讀書十八年都唔願返香港……」
其實王叔好錫兩個仔，他當年在大陸解放前擔驚捱凍走難到香港，白手興家咁辛苦，既然莎厘娜已經打好基礎，交畀兩個仔發展享清福咪重好?!
「天下第一湯」
好多人嚟莎厘娜，都識得叫羅宋湯，客人封它為「天下第一湯」。飲落椰菜、番茄等材料在舌中溶化，肉味鮮甜，絕對真材實料。原來美味的秘訣係用隔夜湯，再同新鮮湯一齊煲，又學咗嘢喇！
王叔話呢個冷盤係正宗俄國風味，有齊凍啫喱肉、魚柳、燒牛肉、homemade腸、鮮蝦火腿和薯仔沙律，連沙律醬都唔同啲。
因為炮製俄菜花時間，莎厘娜保留咗部份經典菜式外，現時大多賣安格斯高級扒餐，大大碟經濟實惠，最緊要係配埋馳名的羅宋湯。
莎厘娜餐廳
地址：香港般含道33號地下
電話：25402874
營業時間：11:00am-3:00pm，5:30pm-10:00pm