港股連續第4日上升，恒指最高9463，收9427，升30點，成交上番近60億元水平，期指高水13點。
恒指已連續3日守穩在20日線9316之上，現時50日線（9528）仍在下降中，呢個位嘅阻力唔細。就算破位而上，下一個阻力9600（大型複式頭肩底嘅頸線水平）亦唔易克服。美股大升之後，噚晚好可能會調整，若然，則港股今日有機會低開，心目中若有對象，則不妨趁低吸入，短炒一轉。
噚日上升股（不計認股證）有260多隻，唔少由近日低位反彈，個勢都幾急。港股方向未明，但唔少質優股好明顯係有人上咗手，只要個市有番啲氣氛，佢哋就會「嗱嗱臨」由低位做番上去，呢啲股份有國企、紅籌同二三線。
國企指數噚日表現大牛皮，微跌0.03點，但明顯係個別發展，重磅股如中石油（857）和華能國際（902）下跌，其他則唔少由低位大幅回升。重慶鋼鐵（1053）收1.14元，升5仙；中海發展（1138）收1.95元，升4仙；上海石化（338）高收1.32元，亦升5仙。呢3隻國企升幅大，亦係有一幫人上咗手嘅「愛股」。
重鋼得，鞍鋼（347）唔得，主要係後者呢一輪有唔少負面嘅消息，包括鄧普頓減持，以及調高折舊率令盈利受損等。看好鋼鐵股，暫時目標可集中在重鋼。
上石化一跌穿50日線立即抽番上去，大行手法，好難捉摸。講真一句，佢哋咁大工程，無非都係想食大茶飯而已。所以，呢個跌浪，上石化到底未，只有大行同基金至知，主要係睇佢哋低位可以「震」到幾多貨出嚟。若果收夠，就會再開車；未收夠，就會跌多轉。
國企除以上3隻外，哈爾濱動力（1133）同鎮海煉化（1128）亦都係有一幫人上咗手，睇下幾時又會大升。鎮化由高位2.525元回落，幅度已達1成，若見到2.2元，應可上車。
至於紅籌同二三線，「愛股」則有中國製藥（1093，收2.025元，升8.5仙）、冠華（539，近日升幅逾1成）、黛麗斯（333）同信德（242）等。信德早輪已作推介，最新消息話睇2.3元。
郭兆誠