美國姿態上有拖慢攻打伊拉克嘅迹象，刺激美股杜指假後勁升逾百點，不過美國聲言不會因反戰聲音而放過侯賽因，美伊局勢暫陷入膠着狀態。美國拖慢開戰，對全球經濟帶來更不明朗因素，港股噚日升近9500已無力再上，收報9427，只升30點，成交唔夠60億元。市場預期美股將行回吐，導致港股無力再上。
噚日較為硬淨嘅藍籌股係中移動（941），市場又傳出英國Vodafone出手增持。中移動近年每次進行注資，都係向Vodafone配售新股，中移動現價低於前兩次配股價，Vodafone現價買嚟溝下貨絕對唔出奇。中移動噚日收18.30元，升1.38%，成交達4.78億元。
瑩輝集團（1163）噚日升7.14%，收報1.20元，成交增加至2003萬元。此股獲得本地基金ValuePartner垂青，並公布已持有瑩輝約10%股權。黑客話，此股有唔少基金捧場，後市料企得硬淨。
電視廣播（511）旗下銀河衞視，傳聞今日會公布引入一間衞星公司入股51%，換言之，好快就會推出收費電視服務，對有線寬頻（1097）旗下有線電視造成直接壓力，有線寬頻股價有可能再下試近期2.425元低位。
黑客話，噚日亨泰（197）配售最多1億股，每股0.59元，集資5900萬元，資金將用作發展國內物流業務。今次配售折讓幅度12%，算係中規中矩，據聞反應唔算理想，但總算圍得晒，相信今日可能會先行震倉，然後有人會慢慢收集炒上。亨泰跌2.9%，收報0.67元。
阿虎