前晚求大俠兩邊飛咁睇兩場歐冠盃直播，咁啱分別睇到阿仙奴伯金同埋國際米蘭嘅列高巴踩人。從犯罪結果睇，伯金成功過骨，列高巴就「斷正」被趕出場，反映伯金老江湖。
伯金不愧為抽水王，前日同阿積士嘅加拉錫碰撞後，係就係失咗少少重心，但就借勢踩落對方隻腳度，逃過法眼；列高巴就慌死人唔知佢踩人咁，兜口兜面踩落巴塞隆拿嘅佩奧爾度，咁揚唔坐波監至出奇。
不過講時講，伯金話晒都係阿積士出身，對住同門師弟都抽水又好似唔係好啱喎，呢種行為唔值得鼓勵。
啱啱喺前日過咗三十六歲牛一嘅巴治奧，雖然無講實幾時退休，不過近日有消息指佢準備喺今年八月六日去東京踢場表演賽，由布雷西亞對東京FC。唔知呢個安排係咪暗示佢退休前可能去東京FC落班呢？另外，嗰日係二次大戰時日本廣島俾原子彈轟炸嘅日子，睇嚟巴治奧想宣揚埋和平喎，真係有心。
效力恩浩雲嘅塞爾維亞及黑山（前南斯拉夫）射手基斯文，雖然只得嗰二十四歲仔，但係就已經學似舒利亞、堅尼呢啲老前輩話想退出國際賽，原因係覺得自己喺國家隊表現不及球會。我求大俠覺得佢認真唔識諗，好多人想為國爭光但係無份，偏偏佢就唔珍惜，希望塞國足總會長史杜高域可以勸勸佢，咪嘥咗件好嘢！
愛華頓又多咗個「神童朗尼」，呢個叫約翰朗尼嘅𡃁仔只得十二歲，係國腳朗尼嘅親細佬，喺上個禮拜同愛華頓簽咗三年約，重成為咗英格蘭歷來最年輕球員！究竟呢個約翰有冇佢阿哥咁犀利呢？姑勿論如何，愛華頓呢個行動就已經夠晒噱頭，就算約翰將來表現平平，借佢阿哥個名都賣得吓錢啩！
話說澳洲國家隊為咗方便部份外流搵食主將，一直想喺英格蘭首都倫敦搵番個球場，作為短期主場。車路士就講明佢哋嘅史丹福橋球場每場十一萬英鎊場租；昆士柏流浪就即刻話佢哋嘅蓮花路球場，三萬五千鎊就有交易！不過平嘢未必好，𠵱家佢哋個場已經有富咸呢位長租客，澳洲到時見到嘅，隨時係塊薯仔田！
逢周一至周五見報