隨着第一下槍聲響起，馬上正式拉開戰幔，而且戰事有席捲全港之勢！唔？大家冇聽錯！今次嘅戰事完全唔受喬治布殊、侯賽因同拉登玩，大家槍口一致向外，齊來打「喪屍」；筆者講緊嘅係近期香港機舖一連返咗兩部人氣度極高嘅「槍Game」，佢哋分別係剛抵埗嘅《鬼屋3》，同超拉闊螢幕版《WORLDCOMBAT》！今日就由「好戰」四男女，示範喺機竇拍拖兼開戰，原來打仗都唔會傷感情。
記者：朱崇德 攝影：黃子偉、朱崇德
Model：Ken、Ricky、Jennifer、Danielle（新星堡娛樂）
好多人玩過《WORLDCOMBAT》後，都會覺得佢係《雷霆救兵》嘅喪屍版；不論由第一章嘅搶灘叢林戰，以至遊戲中段嘅城市街頭巷戰，都有好有《雷》嘅影子，再加埋接近60吋嘅超大同超真實畫面，玩落簡直以為自己喺戲院睇緊電影！
上彈嘅方式都好鬼馬，只要槍口一離開畫面就自動上彈，而且玩家面前重有護盾一大個，並完全進入刀槍不入嘅防禦狀態，大大增加遊戲的變化性！
攻略心得：2至4人玩時，每局最好成績的玩家，可以獲獎「心」一個，所以大家的存活機會大增；另外由於遊戲畫面超大，如果用「放底槍入彈、舉高槍射擊」的姿勢，會令人好易累，較佳姿勢係將槍口恒定指向畫面，然後用手指蓋過感應器，好處是慳力，用防彈盾掩護得又快！
可4人同打的街機槍Game真係唔多，《WORLDCOMBAT》就係其中罕見嘅一部！不過更難得係光線槍感應做得非常好，就算極斜的入射角亦非常準確！Ken同Ricky就最鍾意約埋另一半齊齊打，話好過淨係同女友打冇對手。
《TheHouseofTheDead》系列一向係街機槍Game中的名門之作。猶記得第一集推出時，佢係首隻根據玩家「燒槍成績」而發展出不同劇情路線嘅勁Game；今次推出到《TheHouseofTheDeadIII》，這種不同路線系統亦予以保留。不過論畫質，可以話係咁多集中最靚一隻，玩過前兩集嘅資深玩家Ricky同Jennifer，都異口同聲話遊戲場景同喪屍造型都「立體」咗好多，而且隨着環境不同，重有光源變化，相對以前一味黑麻麻玩Mood玩氣氛，今集打起喪屍嚟，特別有實在感。
攻略心得：今次支散彈槍設計非常重手，好有質感，弊處係令玩家好易累，所以如何減省體力消耗，係一鋪爆機嘅大前提；一般喪屍的死位喺頭部，打身要4、5槍，打頭2槍搞掂，比較慳水慳力，玩時可將準星停在上半畫面掃射，比較易中「頭獎」！不過此招打「中佬」時並無效！
Ricky話，《鬼屋3》由以往用手槍仔，改為件頭非常大嘅散彈槍，最過癮係「入彈方法」係仿照真實散彈槍嘅「上膛」方法，重可以好似電影《T2》中亞諾舒華辛力加的「Fing槍」上彈，唔止可以喺佢面前型到爆，而且女仔氣力冇咁好，贏硬佢！
阿Ken話自己飲日本漫畫「奶水」大，怪盜雷朋三世早就係佢偶像！最近潮流興復古，又有佢嘅槍Game出現街機場！玩法除咗一般打打殺殺之外，重有好多千奇百怪嘅任務，例如在一定時間內打下十數輛警車，用「吸收光線槍」在重重紅外線防盜眼中，偷出鑽石珠寶等，令遊戲趣味大增。
攻略心得：時間基本相當夠用，所以最緊要打得準，不過亦有某些版需要快連擊（例如打警車）。
更過癮之處，係除咗一般光線槍版之外，尖沙嘴「金星」重同時入埋用鍵盤作輸入嘅Typing版，所以真係男女都啱打。阿Ken就帶埋唔多識打機嘅女友Danielle一齊玩，話可以培養共同興趣。
電話：27236235
地址：九龍尖沙嘴加拿芬道20號加拿芬廣場地下