市場繼續憧憬美伊唔會開戰，港股噚日一度升破9400，收報9397，升13點，成交萎縮至47.12億元。不過呢啲可能只係歐洲佬一廂情願嘅諗法，至於美國佬點諗，就要睇周二晚美股表現。
剛重組零售業務嘅會德豐（020），市場仍然憧憬吳光正會將佢私有化，刺激股價上升6%，收報6.15元，成交達4560萬元。新亞置業（049）只微升1.7%，收報2.925元。黑客同阿虎講，其實新亞至係該系公司下一個私有化目標，不過新亞早前已經炒咗一輪，現時好難估重有幾多水位可以炒高，而且新亞貨疏，買賣困難，所以炒家炒住會德豐先。
藍籌股開始進入業績期，市場普遍預期公司盈利倒退，如果跌得少已經偷笑，不存厚望。不過派息方面可能唔差，尤其是踏入70周年嘅恒生（011），市場一般預期恒生會派特別股息回贈股民。反正公司暫時冇乜投資機會，派多啲息益股東又有乜所謂。
九巴（062）今年亦踏入70周年，可能亦會派高息。另一隻可能派大息嘅股份係數碼通（315），此股未有因市場憧憬派息而過份炒高，值得留意。
中華數據廣播（8016）第二大股東可能向大股東收購54.06%股權，噚日復牌後一度急升25.68%，高見2.30元，其後有大戶出貨，令升幅收窄至18.85%，收報2.175元，成交233萬元。由於第二大股東本身持有25.16%股權，若果再買多54.06%，將合共持有79.22%，因此交易一旦成功，大股東在市場直接沽貨壓力減少，加上街貨只得20%左右，要大舉炒上並無難度。
阿虎