蕭正楠前晚喺中環添馬艦同太子嘅浴德池拍攝西門子電話廣告，只見佢着住件衫浸喺浴池度拍攝，場面幾古怪。
西門子廣告之前搵過容祖兒同鄭希怡拍攝唔同型號嘅電話廣告，蕭正楠呢次幫新款西門子S57拍廣告，廣告商話揀蕭正楠係因為覺得佢似I.T.人。
蕭正楠話：「呢個電話真係好啱我，因為可以影相自拍、同傳短訊。」對於被廣告商讚係「新人王」，蕭正楠就話：「我今年都變咗舊人。」
蕭正楠重獲Hyundai借出SANTAFE四驅車拍攝，佢坐喺架車度，猛用手機傳短訊。
三個女仔走埋一齊拍打片，難免一定俾人拎嚟同荷李活電影《神探俏嬌娃》比較。前日莫文蔚、舒淇同趙薇，一齊去東京宣傳電影《夕陽天使》，被日本記者問到佢哋比起三位俏嬌娃，自覺有乜嘢過人之處，莫文蔚話：「我哋套片有故事性啲！」趙薇話：「我哋打得勁啲!」而舒淇就話：「我套片感情抒發得詳細啲！」
黃夏蕙喺羊年開始真係好黑仔，噚日佢到西貢警署備案，原來佢話近排不時收到恐嚇電話，前日佢嘅菲傭又發現喺佢匡湖居屋企附近有兩個人拍攝佢間屋嘅外貌，夏蕙姨為免人身安全受到威脅，所以去警署報警，不過夏蕙姨就認為自己行得正企得正，所以唔會改電話號碼避騷擾。
楊紫瓊日前喺上海舉行記者會，為佢投資嘅新戲《女飛俠》招募演員，楊紫瓊喺戲入面扮演女版蜘蛛俠，平日佢會係普通人一個，但一戴起面具就會變成抱打不平兼鋤強扶弱嘅女俠。
楊紫瓊話佢重籌備緊另一部電影《花木蘭》，雖然佢知道呢部戲好難拍，不過楊紫瓊就好有信心，重話開呢部戲嘅目標係爭奪兩年後嘅奧斯卡「最佳外語片」。
林保怡噚日喺將軍澳電視城出現，原來佢農曆新年期間去咗日本旅行休息，不過佢坐飛機去日本途中，航班突然要折返香港，當時佢好鬼驚，不過又唔敢諗太多，後來先知道飛機機翼發生問題，雖然最終令佢行程延遲，但總算有驚無險。
劉德華同張栢芝主演嘅《老鼠愛上貓》上周五喺香港上映，四日收約七百幾萬，內地就兩個禮拜收約千七萬，成績都算唔錯，所以寰亞老闆林建岳呢排都好開心，因為之前《無間道》叫好叫座，喺今次香港電影金像獎中又有十六項提名，《老》片又冇令佢失威，佢對老爹林伯總算有交代，難怪佢對投資電影愈嚟愈有興趣。
