一味窩輪：9千5樓上收集Put輪

美股前晚休市，港股頓失方向，恒指昨日喺75點之內上落，如果失眠，望住個大利市機，一定瞓得着。全日計恒指升咗13點，成交縮至47億元，冇乜啟示。
是日最醒嘅藍籌係會德豐（020），大升6%，收6.15元。唯一嗰件會德豐Call輪9469被正股帶動，飛升48%，由56仙跳上83仙，不過交投認真疏落，唔夠10萬銀。
9469做咗是日輪王，現價微有負溢價0.65%，4月8日到期，槓桿率7.4倍。純以數據而論，9469揸得過，但正股呢兩日借重組消息炒上，已經升咗唔少，隻輪是否追得過，大家自己計數。

恒指升近阻力位
港股經過近周反彈，走勢漸見改善，但已升近主要阻力位。50日線𠵱家喺9539，中期下降軌阻力則在9600水平，照計唔易衝破，畢竟美伊危機未除，隨時可再作做淡理由。
手上已有Call輪者，不妨揸多一陣，如果手上冇貨，𠵱家至高追Call輪，未必着數，倒不如等恒指返上9500樓上做淡，收集恒指Put輪。
賭性強嘅可以揀9556，貪佢槓桿大，但要留意下月28日就夠鐘。遠期啲嘅可揀9619，昨日收0.212元，玩到5月尾，溢價5.6%，槓桿率17.7倍。
章盛