全國政協副主席霍英東貴為國家領導人，好少喺香港公開發言，噚日佢喺中華總商會大談南沙同珠江三角洲，反對起港珠澳大橋同埋開徵陸路離境稅呢啲敏感嘢，就由佢個顧問何銘思開炮，佢自己就講番當年啲趣事。
霍英東話七十年代返大陸投資，會俾港英政治部班友仔「阿支阿左」：「我哋去深圳都唔敢過關，叫袁賡（招商局蛇口工業區創辦人）用遊船載我哋去，自己帶埋三文治同埋礦泉水。去到深圳佢哋淨係畀張枱我哋開會就得。」咁咪即係「偷渡」？
霍英東重話廣州白天鵝賓館二十年前開業嗰陣，佢都有「犯法」。話說當時物價局規定青島啤酒每支四毫八，但係白天鵝就賣個幾銀錢一支，皆因要「燈油火蠟」，好彩霍英東後台夠硬，地方小官都唔敢「執法」。
（圖）霍英東（中）同何銘思（左）話返大陸唔係為賺錢，反而捐好多錢辦學校。呢張就係佢哋同羌坑小學學生嘅合照。 霍英東基金會圖片
傳真︰2623-9278
電郵︰