旺角嘅《特警2》酒吧，一向係同區出晒名嘅劈酒場！不過最近佢哋出招冧女人，就係逢星期一晚（8:00PM後）呢度都會有塔羅牌占卜加紋身！呢個新玩法大概玩咗一個星期左右！不過勁受女性顧客歡迎，基本收費大概由$60起，可以玩30分鐘塔羅牌占卜（問一個問題），然後再做一個「短期紋身」增運，收費都真係算平。
小記走訪當日，咁啱撞正靚女拳手亞Be，搵占卜師Leo做塔羅牌占卜，兩句未講完Leo就測出亞Be喺金錢方面需要增運！解決方法好簡單，唔使帶乜又帶物咁麻煩，一個簡單嘅荊棘形紋身就完全搞掂！
不過大家唔使擔心，Leo所做嘅紋身，係用美國紋身油彩畫上去，兩、三日就完全甩清！塔羅牌占卜加短期紋身，你話有乜方法唔冧盡女人心！
如果想玩得激啲，呢度連真紋身都有得玩；逢星期一晚8:00PM後就有常駐嘅大師傅替你操刀，佢係灣仔最大紋身舖《新奇》嘅太子爺亞Lo，雖然年紀輕輕，已經繼承了家族手藝。基本紋身收費大概$300起，一個荊棘形嘅手臂環嘅紋大概都係$1,200至$1,300左右，相對好多上樓舖嚟講，真係算好平啦！
電話：23936664
地址：九龍旺角通菜街252號地下
Leo預約電話：91528679
亞Lo預約電話：94290865