響即將舉行嘅日內瓦車展上，除會展出我哋早前曾作介紹嘅新版平治CLKCabriolet外，來自法國嘅標緻車廠亦會於車展會場上，展出備受車迷關注及全新嘅307CC開篷車，相信屆時定能惹來不少車迷嘅注視目光。
全新307CC嘅造型與現有307型號相近，但關上篷頂後極具流線型嘅車體設計，卻能予人有一份Coupe跑車嘅風采；想變做開篷車？過程好簡單，你只需輕按控制鍵，電動硬摺頂便會自行開關，而需時更只係25秒內咋！車廂布局亦以跑車化為主，除前後兩排跑車座椅配搭非常搶眼外，跑車化嘅白表板組合及三幅式跑車軚環，亦能予人有置身於高性能跑車之感呢！另外，廠方又為新車提供兩台2.0公升引擎供用家選擇，其中一台馬力輸出為140匹，而另一台則為182匹，再輔以5前速手波或4前速半自動波（半自動波只配於140匹型號），從而令新車有更出色嘅性能表現。有興趣嘅車迷，就要留意我哋關於日內瓦車展嘅報道喇！