小初前日講過，依利安達（033）可能因建滔化工（148）繼續增持，稍後會有異動。依利安達噚日股價唔見異動，只係微升0.01元，收1.06元。隻股可能如經紀陳所言，還要再坐一會才見真章。至於建滔則跌咗0.10元，收6.70元。
經紀陳同小初講，佢話建滔股價高處未算高，唔排除稍後再跨越高峯。
經紀陳又話，對建滔又愛又恨嘅一間歐資行，以往出過報告讚佢，但亦曾鬧過佢，噚日間行又出報告唱好建滔會跑嬴大市。
歐資行所持嘅理由好簡單，就係公司產品受惠全球電子行業復甦，1月份生意增長強勁，雖然原料價格升咗，但建滔打算提高產品價格抵銷影響。總之一句講晒，建滔生意好掂。
隻股一直有專人睇住個場，所以就算股價曾經碌過落去，但好快就抽番上嚟，加上唔少工業股近期屢創新高，好似由同一間歐資行睇住嘅創科實業（669），噚日又創8.80元新高。因此，經紀陳睇好建滔，小初都認為有理由。
慕容小初