發展商賣樓花招層出不窮，長實同新地合作嘅天水圍慧景軒，為咗標榜項目四周圍都係綠化地帶，今日專程搞個記者會，介紹呢個「綠意城市」。最特別嘅係出動到熱氣球宣傳，以往發展商介紹樓盤環境，多數坐直升機，坐熱氣球都係第一次，果然創新。
聽聞呢個「熱氣球之旅」，專程喺英國搵個專家返嚟，負責駕駛個熱氣球。至於準買家有冇得坐，長實話今日有分曉。今次熱氣球之旅係聯同自然基金一齊搞，自然基金請咗藝人馬浚偉擔任綠意大使，女藝人應采兒同埋曾參選港姐嘅嘉碧儀任菁葱之星。
回想當年長實促銷嘉湖山莊嘅時候，曾經搵天王黎明幫手，今次又係天水圍樓盤，再次施展名星效應，唔知效果會點呢？
美聯物業精英，噚日舉行咗今年第一項活動，由集團主席黃建業，聯同今年精英會會長黎偉強，齊齊帶會員去打Golf。黃老闆首次喺下屬面前表演球技。今次以Golf為主題，原來係經精英會內搞過投票，Golf係最受歡迎項目之一，而今次活動，結果有六十二人參加，出席率達九成，果然受歡迎。賽後有頒獎活動，當然唔少得來個大合照，同勉勵大家努力工作嘅演說啦。
原來今年美聯精英會定出嘅主題係「追求卓越，傲視同群」。寓意各精英喺今年突破極限，務求贏自己、贏市場。
酒樓食肆愛沿用同行舊舖，因有現成嘅生財工具同裝修，只要執吓個舖就可以開張。啱啱租出嘅銅鑼灣謝斐道五百號地舖，原租客同新租客都係燒味店。
租出嘅地舖二千二百八十呎，原本由喜喜燒臘茶餐承租，新租客係太興燒味。行內人估計，月租十八萬，每呎七十九蚊。中原梁達雄同蘭西講，太興燒味喺謝斐道有間舖，但只得千二呎，𠵱家搬個間大啲嘅舖位。
但原來銀行都鍾意租用同行舊舖，中環德輔道中八十八號地下I舖，千三呎，前身係華僑商業銀行，𠵱家由渣打銀行，以每月十八萬租用。
永常集團董事總經理胡永輝，為已故金王胡漢輝之弟，家族經營黃金，不過胡永輝就睇好地產，視地產為本業，認為投資物業，始終較為穩陣。
佢時刻記住，地產界前輩，新地創辦人郭得勝曾經講過，利息平、樓市起，所以現時利息咁低，令胡永輝睇好樓市。永常集團以投資收租物業為主，於北角、尖沙嘴及上環都有寫字樓收租，而今次深水埗菁盈雅軒，屬於集團少有的地產發展項目。
情人節當日，世紀21安興喺將軍澳中心間酒家擺咗四席春茗，旗下將軍澳區分行共二十幾人出席，搵埋恒生、滙豐、中銀同港基銀行嘅代表，齊齊食番餐。其間唔少得玩吓抽獎，包括現金同獎品。最實際嘅係現金獎，總額有兩萬銀。而個人現金獎，最高有三千蚊。
公司董事鄺志輝話，今年將會主攻區內二手居屋，希望營業額可以增加兩成。
蘭西
電郵地址：
