DV數碼攝錄機愈出愈勁，SONY喺推出富貴級嘅200萬像素機種後，連低價入門市場都唔放過。喺最新嘅MiniExpo度一次過Show咗幾部新款DV，有齊120倍變焦、TouchScreen同蔡司鏡頭，機能上已算不錯選擇，不過全部賣價都係幾千蚊，最平嗰部更係五千蚊有找，此舉肯定令好多人扑鎚入貨，進一步推高DV熱潮。
文、攝：馬哥
ImgaeGirl：Crystal
全系列四款型號嘅鏡頭，均採用高質素蔡司鏡，變焦效果更達120倍（12×數碼加10×光學），睇演唱會坐山頂位都可當望遠鏡咁用。新機系列另一優點就係夠細，體積比上一系列細了百分之二十八，而重量則減少百分之二十二，最輕的是DCR-TRV19/E，只有520克，一隻手掌剛好拎到，就算女仔用家長時間拎住拍攝都冇咁易會攰。
四款機入面最平嗰部型號為DCR-TRV19/E，賣價只係$4,990，呢個價錢買部二手機都未得啦，若以前心思思想玩吓數碼攝錄，又嫌DV機賣得貴，不妨趁今次入市。
若嫌較低檔嗰兩款機解像度唔夠用，可選擇另外兩款較高檔嘅型號，當中DCR-TRV38/E及DCR-TRV33/E均配備1.07百萬像素CCD，以520線水平解像度來提升影像的清晰度。至於屏幕方面，新機系列更全線引入TouchScreen（輕觸式屏幕）設計，操控拍攝更為方便，毋須慢慢搵對應嘅功能掣。除方便設定選項之外，更可以它來鎖定焦點，用戶只需輕觸屏幕確定拍攝對象的位置，即使隔住窗或其他障礙物拍攝，亦較易對焦。
另一改良地方，就係四款新機均支援最新推出的SQ系列鋰離子充電池，可在充電期間及充電後顯示剩餘電量，唔怕影影吓冇電咁失威。
32GB容量極限
MemoryStickPRO是SONY與SanDisk共同研製，暫時提供1GB、512MB及256MB三種容量選擇，將於三月在香港開始發售。當中的「PRO」來自創新的設計概念，分別是革新（Progressive）、專業(Professional)，及保護（Protection）。理論上，MemoryStickPRO最終可達32GB的容量，保護功能包括讀寫保護功能AccessControlFunctions及MagicGate版權保護技術。另一改進之處是具有雙倍的數據連接器，傳輸速度有160Mbps或15Mbps抄寫速度。除了新款的SONYDV之外，已上市的CyberShotF717數碼相機都兼容這種新出的MemoryStickPRO。
四款新機均配備有MemoryStick插槽，配合SONYMPEGMovieEX影片拍攝功能，可將MPEG有聲短片儲存於MemoryStick上，令影像儲存多一個選擇。而儲存在錄影帶上的短片亦可在攝錄機內轉換成MPEG影片格式，方便用戶以電郵傳送影片或將影片加插在網頁內。此外，用戶亦可一面拍照，一面拍攝短片，並將影像儲存於兩種MemoryStick上，靈活運用的話便會發覺MemoryStick嘅方便。
四部DV除有例牌的i.LINK外，亦設有USB插頭，只需利用隨機附送的《PIXELAImageMixer》軟件，就可以錄影帶的影像燒錄成VCD光碟。速度方面，將60分鐘影像錄製成VCD約需時2小時，比一般的DV快1小時，如果閣下電腦或Notebook無i.LINK就啱晒。
22/E同33/E都支援MemoryStick，不過跟機得8MB就無乜良心，有心用DV影相或拍MPEG的朋友一定要另購大容量的MS，寧願佢唔好送而降低機價更為實際。反而應該有的指示筆又唔送，要人手指指喺個2.5吋TouchScreen上篤來篤去，手指大的人會好易篤錯隔籬。