與賓架U自「銀行家會所」拜拜之後已經兩點幾，落到置地廣場做吓windowshopping。𠵱家我哋呢啲唔講普通話嘅人，入到名店會被認為係「港燦」，屬於窮鬼一族，所以都係站在外邊望吓，望梅止渴算咯。望望吓，俾人喺後面拍膊頭。原來係大經紀A先生；A先生不久前炒晒啲AE（經紀），實行縮皮，只做老客戶生意，改打守勢波，算係滋陰補腎。可能生意清閒啩，A先生唔使趕返寫字樓睇住下午開市。
A先生話：「幾個老夥計會睇晒嘅嘞。政府成日叫我哋增值，分散客源。都唔知道市場咁萎縮，增極值都冇用。譬如時富證券夠進取啦，一早搞網上交易，四處開分店，擴大客源，做足marketing，又係做得幾好噃，但係而今都要關閉所有分行，你話增值有乜用？我就守舊啲，希望可以渡過難關。」
A先生談得高興，講咗好多嘢，竟說溜了嘴，話中銀劉金寶可能就快調返京師，都唔知真定假。以我哋嘅想法，中銀香港上市，劉金寶功勞甚大，理應可以留港享受成果。但京師風雲變幻莫測，俾我哋估得中嘅嘢，甚為少見，譬如九五年間，我哋點估到董先生做特首呀。
講起董生，自然諗埋董太，讀者Jesse來電郵，講到二月九日本欄，Jesse話：「閣下在上述文章將董太之智商與其他人比較，請公開向勞拉道歉！」唔使啩，勞拉都唔慌會睇到「GG細語」，側側膊，唔多覺，算了吧！