自從上年《蜘蛛俠》大收之後，以經典美國英雄漫畫改編而成嘅特技電影陸續有嚟，由班亞弗力（BenAffleck）主演嘅《夜魔俠》，啱啱正式喺美國上映，即成票房冠軍，而有影后荷爾芭莉（HalleBerry）同猛男曉治積曼（HughJackman）坐鎮嘅《變種特攻2》，亦將會喺五月出籠，電影公司好睇重呢部戲，所以早幾日出咗盒特別版DVD《X-MEN1.5》，乘機為電影造勢。
我大口羅拉身為漫畫《X-MEN》嘅fans，前年《變種特攻》第一集嘅DVD推出嗰陣，已經即刻買咗返屋企睇，雖然𠵱家新出嘅雙碟特別版DVD《X-MEN1.5》，頭一隻碟都係《變種特攻》第一集，但仍然叫我羅拉唔買唔得。
點解？因為今次特別版DVD除咗收錄《變種特攻》第一集嘅刪剪片段之外，喺第二張DVD入面，重有《變種特攻2》嘅預告片，而繼續執導第二集嘅導演BryanSinger，重做埋主持，介紹續集嘅絕密製作花絮，至於扮演「狼人」嘅曉治積曼同扮Storm嘅荷爾芭莉，接受訪問嗰陣重冇落妝㖭，好鬼過癮！