「女人四十爛茶渣。」呢句話對Joan卻不以為然，因為這正是她開創事業的另一轉捩點。做超市連鎖店理貨員的Joan，大約三年前因為失業就一直待在家中，過着沉悶的煮飯婆生活，睇影碟就成為她其中一種消閒方法。直至最近，發覺生活實在太苦悶，好想有些搞作，同時再次證明自己工作能力。
記者：陳冰麗 攝影：陳穎
逢星期一至三刊出
一次經朋友提點下：「反正自己又鍾意睇碟，何不將興趣變成一盤生意。」靈機一觸下，Joan就利用自己一生積蓄二十多萬，以一年時間部署，搵舖、學習入貨，結果開舖三個月即回本。
以前淨係識開關VCD機的Joan，甚麼是S-Video、5.1杜比立體聲、色差、光纖等等全都一竅不通，全靠背後有強力支持部隊。「最初都有啲驚，話晒已經三年無工作經驗，完全要由頭學起，好在我朋友多，有個開影音舖嘅朋友畀到我寶貴意見，幫我引路入貨、買架放影碟，同時又有精通影音嘅姪仔喺背後做我枝盲公竹，最緊要自己多啲睇書吸取知識，好似紅、黃、白線係乜、點駁線、咩叫做LineIn、LineOut等等！」經過高人指點，自己又不斷刨影音雜誌，現在的Joan儼如影音專家。
1.多元化：租售影碟兼備，還有影音器材、副產品如機線等，提供買賣方便，市面大部份影音舖罕見。
2.以廉取勝：租碟一律$8，每套片重可以存放兩日一夜，畀足夠時間大家睇。
3.即時試音：舖內設有大型投影器，買影音器材或影碟可即時試音質或畫面效果，保證滿意至交易。
4.免費安裝：提供大公司沒有的服務，買千零蚊的影音器材同樣提供免費送貨服務，兼夾有人代為安裝。
5.送贈品：租或買任何影碟一隻可獲印花一個，集齊數目，可免費換取禮品，包括儲值電話卡、卡拉OK咪、蜘蛛俠DVD影碟等。
Joan搵過港九無數吉舖位，但好舖難求，搵到理想的舖頭，租金卻貴得驚人，至少二萬多元，對於她的資金來說無疑是一大難題。一日無意中揭開報紙，得知原來有屋邨投標搵平舖呢回事，於是就集中火力，進攻屋邨舖位，務求可以搵到較平的舖位，即使開舖未能賺也無咁傷，只要夠交租都可以守落去。
搵了多月，最後她揀選柴灣其中一個屋邨商場，揀這裏因為位置鄰近地鐵及屋邨，人流多，做街坊生意都應該有得做。不過Joan仍然好謹慎，專誠在商場及附近街道企了三日。「最好做rearch先，一來睇吓附近街坊係乜嘢人多，二來要睇吓附近有無其他嘅影音店。」
Joan從未試過做生意，更從未試過到屋邨投標開舖，一切都靠心口個「勇」字。她根據報紙上房署的公布，同時又親身走去辦事處查詢每項細節，然後寫信及入表到房署，Joan坦言：「讀書的時候都未試過咁勤力，入咗標之後，心情患得患失，怕失敗之後又唔知幾時再有好舖，所以嗰陣子人都瘦咗八至十磅。」結果等了兩個多月，才知道自己中標，Joan表示至今的心情仍相當高興。
為了慳人工成本，粗重工作還是她一手一腳做晒，對於失業多年的Joan來說，無疑有點吃力，但Joan慶幸說：「起碼自己年多嘅努力無白費，雖然換嚟係無時間休息，一日起碼要做十二個鐘頭以上，幾辛苦，但自己就好有滿足感。」
Joan凡事親力親為又親切，深得街坊受落，旺市新年期間，足以令她儲落一班熟客仔，她又會應客人所需幫他們預留最新熱門影碟等等。這區以老人及小朋友為多，一些冷門戲曲及卡通片，在此亦容易搵到。種種留客招數，令到她開業不足三個月已可回本。