財爺梁錦松嘅羊咩女邊日出世，最近已經取代公務員減薪、財赤搞唔搞得掂等話題，成為傳媒界最大一個懸念。原本有傳聞話小伏已經預定今個月底剖腹生產，前晚忽然傳到鬧哄哄，噚日更有接近財爺消息來源報章大字標題，話小伏漏夜作動，入咗瑪麗待產，阿松嗰邊又諱莫如深，話私人嘢，冇得講。
不過瑪麗公關噚日實牙實齒同八方講，佢哋醫院冇小伏入院嘅紀錄，亦唔會特登為某人掩飾，有就會話有，冇只能講冇。至於產前檢查呢？就冇得問。
雖然瑪麗話冇，不過小伏產女都會係呢個月嘅大事，風水大師蘇民峰就話，如果BB女趕及三月六日「驚蟄」前，即係讀第二份預算案當日或之前出世，就會一世行好運，三月六日之後出生就冇咁正，就屬百搭命，都會一生平穩。咁咪即係要喺打小人之前降生？
阿松呢幾年都要為財赤頭痛，BB女個名係咪應該避開「彤」、「丹」、「紅」、「朱」、「紫」呢啲字眼？蘇師傅話如果松女三月六日前出世，叫「彤彤」更加好，因為「彤」字用條脷發音，屬火，夾晒BB女命格，反而「雯」、「平」、「明」等用唇發音嘅字屬水，蘇師傅建議阿松唔好用。
傳真︰2623-9278
電郵︰