講到禮拜三歐冠盃最懸殊戲碼，應該係AC米蘭主場對莫斯科火車頭。心水清嘅球迷應該知俄國聯賽下個月至開鑼，成班球員手硬腳硬，唔怪得連教練森文都講明呢個唔係作賽好時機，扯白旗投降咁滯。
俄羅斯球隊同埋一啲北歐球隊近年響歐洲賽通常有頭威無尾陣，主要因為佢哋球季進行時間同其他歐洲國家唔同，人哋踢到㷫烚烚，佢哋就歇冬。所以一去到分組賽次圈階段，買佢哋對家多有着數。
不過今場波多咗個變數，就係AC可能派啱啱響歐冠盃註番冊嘅列當度踢正選，我求大俠從來唔懷疑列當度嘅球技，不過佢復出踢過幾場正選，AC贏波率唔高，唔知呢位邪星今場波會唔會愈幫愈忙？
「老費飛靴傷碧咸」事件震動全球，英國報紙就乘機引伸大談領隊權威。英國《太陽報》就話如果英格蘭領隊艾歷臣學到費爵爺咁，建立吓威信，英格蘭國家隊就一定前途更好。我求大俠聽落都覺得有道理，因為艾歷臣上任後每次點兵都掛住同啲球會妥協，個角色似做公關多過似統帥。
歐洲傳媒從來都唔放過羅馬托迪，就算人哋有傷唔可以落場比賽一樣有新聞。最近有本外國雜誌就幫佢占卜算運程，話佢同女朋友巴拉絲好合襯，但最搞嘢係占卜預測托迪到六月就開始性能力下降。我求大俠對占卜呢家嘢不嬲係寧可信其有，不過六月啱啱係唞暑開始，可以放縱，如果到時至「唔掂」就慘囉。
截稿時未知國際米蘭前鋒韋利對巴塞隆拿有無士哥，不過呢位仁兄最近真係弗到震。佢𠵱家響歐洲金靴獎（歐洲聯賽入球比率最高者）射手榜領先。查實都係好事，因為呢個獎周不時俾啲土耳其或者蘇超聯嘅射手攞。唔止咁，聽講自從韋利甩拖之後，好多索女向佢投懷送抱，真係球場情場兩得意。
我求大俠聽聞美國奧運男籃即將加添兩位猛將加盟，就係帝王嘅碧比同埋爵士嘅馬龍，睇番兩位仁兄係今季NBA嘅表現，我都好贊同佢哋入選；但係諗番轉頭，馬龍到七月就滿四十歲，佢曾經講過要打完今季先至考慮自己嘅未來，而雅典奧運要到明秋先至舉行，咁樣係咪意味馬龍來季會繼續留係NBA打波呢？